Kalaallit Nunaat nalunaaqutaqatigiissunut sisamanut avinneqarsimavoq, Nuuk Københavnimut naleqqiullugu akunnernik sisamanik nikingalluni.Assi: Emil Helms/Ritzau Scanpix

Kalaallit Nunaata nalunaaqutaqatigiissut nammineq aalajangiiffigisinnaalerai

Kalaallit Nunaata nalunaaquttap aaqqinneqartarneranut atatillugu nammineq maanna aalajangiisinnaassuseqalerpoq. Inuussutissarsiortut Europamik niueqateqarnermi sivisunerusumik piffissaqarnerulernissartik neruutigaat.

Nunat assigiinngitsut nalunaaquttap aaqqinneqartarnera namminneq aalajangertarpaat.

Assersuutigalugu aasaanerani nalunaaqutaq atuutilersinneqassanersoq atuutilersinneqassannginnersorluunniit aalajangerneqarsinnaalluni.

Kalaallit Nunaata nalunaaquttap aaqqinneqartarnerani nammineq maannamut aalajangiisinnaassuseqartitaasimanngilaq, tamannali ippassaq allanngorluni.

Naalakkersuisummi naalakkersuisuata Múte B. Egedep, Danmarkip angallannermut ministeria Trine Bramsen ippassaq isumaqatigiissusiorfigaa, nalunaaquttap aaqqinneqartarneranut tunngasuni isumaqatigiissusiorfigalugu:

- Ukiuunerani aasaaneranilu nalunaaquttap aaqqinneqartarneranut, nalunaaqutaqatigiissullu nunatsinni aaqqiivigineqarnissaasa Inatsisartuni oqallisigineqarnissaannut qilanaarpugut. Sinaakkutissallu nutaat nammineq atorfissaqartitatsinnut soqutigisatsinnullu naleqqussarneqarnissaannut aqqutissiuisinnaassalluta, Múte B. Egede tusagassiutinut nalunaarummi oqarpoq.

Trine Bramsen aamma nuannaarpoq

Nalunaaquttap aaqqinneqartarneranut malittarisassat Kalaallit Nunaannit nammineq maanna akisussaaffigineqalernera angallannermut ministerip Trine Bramsenip aamma nuannaarutigaa:

- Namminersorlutik Oqartussat nalunaaquttap aaqqinneqartarneranut namminneq aalajangiisinnaassuseqalernerannut piffissanngortoq oqaatigineqarsinnaavoq. Kalaallit Nunaata tamanna nammineq soorunami akisussaaffigissavaa, Trine Bramsen oqarpoq.

Kalaallit Nunaat nalunaaqutaqatigiissunut sisamanut avinneqarsimavoq. Nalunaaqutaqatigiissut taakku qanoq aalajangersarneqarsimanersut angallannermut ministereqarfiup ilisimanngikkaa ministereqarfiup oqaatigaa.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl