Danmarkip nunarput upalungaarsimanermi tapersersorniaraa: Qanorli oqaatiginngilaa

Naalakkersuisut Danmarkimi ataatsimeereernerup kingorna Danmarkip Kalaallit Nunaata upalungaarsimaneranut tapersiiniartoq oqaatigaat. Tapersersuinerli suna pineqarnersoq ilisimaneqanngilaq.

Allattoq Markus Valentin

januaarip 16-at 2026 10:04

Nutserisoq Connie Fontain

Danmarkip Kalaallit Nunaat upalungaarsimanermut atatillugu tapersersorniarpaa.

Naalakkersuisut tusagassiuutinut nalunaarummi allapput.

Aalisarnermut, Piniarnermut, Nunalerinermut, Imminut pilersornermut Avatangiisinullu naalakkersuisoq, Peter Borg ulluni makkunani Danmarkimiippoq.

Taassuma inuiaqatigiinni sillimaniarnermut upalungaarsimanermullu ministeri, Torsten Schack Pedersen ataatsimeeqatigaa.

- Kalaallit Nunaat upalungaarsimanikkut patajaatsumik tunngavissaqareerpoq, pissarsiffiulluartumillu ministerit ataatsimeereerneranni – nunatsinni aamma suleqatigisatsinnik qaninnerpaanik – qanimut suleqateqarneq annertusarneqaqqissaaq. Naalakkersuisut Kalaallit Nunaanni upalungaarsimanerup pitsanngorsarnissaanut Danmarkimit tapersersuineq erseqqissoq qujamasuutigaat, Peter Borg allappoq.

Danmarkip qanorpiaq ikiuunniarnera oqaatigineqanngilaq. Kalaallit Nunaanni upalungaarsimanermi sumik tapersersorneqarnissaq pisariaqartinneqarnersoq aamma allassimanngilaq.

Ataatsimoornissarli pisariaqartoq, Torsten Shack Pedersen tusagassiuutinut nalunaarummi allappoq.

- Kalaallit Nunaanni upalungaarsimaneranut tapersersuinissara piareersimaffigalugu aamma Upalungaarsimanermut Aqutsisoqarfiup aamma Inuiaqatigiit Isumannaatsuunissaannut Aqutsisoqarfiup tungaanniit tamanna atuuppoq, ministeri allappoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.