Suliffissaqartitsineq nungusaataanngitsumik aalisartarnermiit Krusep pingaarnerutippaa
Aalisartut isumaattut saarulliit amerlassutsimikkut amerliartorujussuanngillat. Pinngortitaleriffimmit pisassarititat pillugit aappaagumut unnersuussutsitik saqqummiummatigit oqartoqarpoq.
Naalakkersuisulli biologit unnersuussutaat avaqqullugit pisassarititat februarimi marloriaatinngortippaat, aviisi Sermitsiaq allappoq.
Unnersuussutigineqartut allanngunngillat
Biologit naapertorlugit saarulliit ullumi imatsinni saqqumminerpaasut 2009-mi tukerput.
- Saarulliit pisarineqartartuni saqqumminerpaat 2009-imi tukerneri pissutigalugit, unnersuussutigut siornatulli ipput. 2009-imi tukertut sinerissaminngaanniit tammagarput, allanillu tukeqqammisoqarnani. Taamaammat siunissami saarulleqarujussuarnavianngitsoq ilimagaarput, Pinngortitaleriffimmi aalisakkanut qalerualinnullu immikkoortortaqarfimmi pisortaq, Helle Siegstad oqarpoq.
Aamma atuaruk Saarulliit tukersimasut isumaqatigiinngissutaasut
Taamaammat kitaata sinerissap qanittuani saarullinniarnermut pisassarititat pillugit biologit ukiup siuliata assinganik 12.379 tonsinik unnersuussipput.
Suliffissaqartitsineq pingaartinneqarneruvoq
Suliffissaqartitsinissarli nungusaataanngitsumik piniartarnermit naalakkersuisunit pingaarnerutinneqarpoq, saarullinnullu pisassarititat 25.000 tonsiutinneqarluni.
- Pisassiissutit annertussusaat suliffissaqartitsinissamik tunngaveqartinneqarput, aalisarnermut naalakkersuisoq Karl Kristian Kruse Sermitsiamut oqarpoq.
Kujataani sinerissap qanittuani apriilimi maajimilu saarullinniarnissamut Kruse aamma ammaassimmat, biologinit unnersuussutigineqartunut aamma tusarnaanngilaq. Aalisarnissamut piffissamik sivitsuinera suliffissaqartitsinermut aamma tunngaveqartoq, Karl Kristian Kruse Sermitsiamut nassuiaavoq.
Aamma atuaruk Pinngortitaleriffik saarulliit pillugit siunnersuuteqarpoq
Saarulliit sinerissap avataaniittut aalisarneqarnissaminnut qajannartut, Pinngortitaleriffik aamma isumaqarpoq. Saarulliillu suffisinnaasut amerlinissaat siunertaralugu kitaata avataani saarullinniaqqusinngikkaluaput. Karl Kristian Kruselli tassani aamma pisassiissutissiivoq.
