VIDEO Saarulliit tukersimasut isumaqatigiinngissutaasut

Saarulliit 2009-mi tukersimasut maanna nunatta kitaata imartaaniittut, suffinissaminnut piariilersut Tunumut suffiartortussaammata kitaani saarulliit ikilingaatsiarnissaat, Aalisakkanut qalerualinnullu immikkoortortaqarfimmi pisortap, Helle Siegstadip ernummatigaa.

Taammaammat saarullittassat amerlineqarnissat aalisartunit kaammattutigineqaraluartoq, aappaagu saarullittassat ukiormannatut iinnassasut, inassutaavoq. 

Saarulliilli nunatta kitaaniittut ikileriasaarsinnaanerannik naliliineq KNAPK-mi siulittaasup, Henrik Sandgreenip isumaqatiginngilaa.  

- Nunatsinni saarulliit alliinnarnikut allaat ilaatigut angingaaramik immaqa nioqqutissiarissallugit ajornakusoortut, imaluunniit filetsiliarissallugit. Taamaattorpassuarnik aamma peqarpugut, taamaammat taamatut oqarneq, tassa saarullinnik 2009-miinnaq tukertoqannginnera oqaatigissallugu tamanna tusaatissatut tiguinnagassaavoq.  
KNAPK-p siulittaasua, Henrik Sandgreen oqarpoq.

Tassalu Pinngortitaleriffiup aalisakkanut immikkoortortaani pisortaq, Helle Siegstad, aalisartut siulittaasuata isumaqatiginngilaa.

Helle Siegstad ippassaq ima oqarpoq: 

- Saarulliit 2009-imi tukersimasut aalisarnermi pingaaruteqarluarput, taakkulu amerlanersaat tunuminngaanneerput, piffissallu ilaanni uterumaarput. Taamaammat siunnersuuterput siornatut ippoq. Tukeqqammisoqarnanilu, taamaammat sianiginngikkaanni nuannataarneq sivikitsuinnaassaaq, aalisakkanut qalerualinnullu immikkoortortaqarfimmi pisortaq, Helle Siegstad oqarpoq.

Aamma atuaruk Pinngortitaleriffik saarulliit pillugit siunnersuuteqarpoq

Pinngortitaleriffiup Nunatta imartaa saarulleqarfinnut assigiinngitsunut pingasunut siullermeerluni immikkoortitersimavaa. Nunatta kitaani sinerissap qanittuani saarullittassatut siunnersuutit nikinngillat, Nunatta kitaani sinerissap avataa Qaqortup Kangerluata avannaani aalisartoqassanngilaq, 90´ikkunni aalisagaaqqat perortussat ikiliartorsimanerat pillugu. Tunumilu sinerissap avataa Nunatta kitaata kujataani Qaqortup kangerlua ilanngullugu 7,500 tonsit Pinngortitaleriffimmiit siunnersuutigaat.

Aappaagu aalisagartassatut inassutit Sulisitsisuniit (GE-miit) tusaatissatut tiguneqarput.