Sulianut angisuunut inatsimmi FNip aalajangersagai malinneqarput
Suliniutit angisuut pillugit inatsit, qanittukkut akuersissutigineqartoq, Naalagaaffiit Peqatigiit Sulisoqarneq pillugu Suliniaqatigiiffiata, ILO-p, isumaqatigiissutaanik unioqqutitsisoq qallunaat isornartorsiuisartut arlallit oqaatigigaluarpaat. Sulisoqarneq pillugu isumaqatigiissutaasimasut atorunnaarsinneqartut, isornartorsiuisartut isumaqarput.
Suliffissaqartitsiniarnermulli ministereqarfimmit nalunaarummi, aviisimit Politikenimit pissarsiarineqarsimasumi, naqissuserneqarpoq, suliniutit angisuut pillugit inatsit pissusissamisoorluinnartoq.
Nalunaarummi, januaarip ulluisa qulingiluaanni ullulerneqarsimasumi, Danmarkimi Kalaallit Nunaannilu Naalakkersuisut ima paasinnissimapput, suliniutit angisuut pillugit inatsit Naalagaaffiit Peqatigiit Sulisoqarneq pillugu Suliniaqatigiiffiata, ILO-p isumaqatigiissutaanut naapertuuttoq. Soorlu peqatigiiffiit kiffaanngissuseqarnissaat pillugu isumaqatigiissutit pingaarnerit, ataatsimoorussamillu isumaqatigiinniartarnissat eqqarsaatigalugit.
Tunngavilersuutilli tamakku atorsinnaanngillat, eqqartuussissuserisoq, Kalaallit Nunaannut tunngassutilinnut paasisimasaqarluartoq, Henrik Karl Nielsen oqarpoq.
- Suliniutit angisuut pillugit inatsisip nunani allani isumaqatigiissutit, qallunaat aamma kalaallit isumaqatigiissutaannit sunnerneqassanngillat. Tamannalu isumaqatigiissutitut aalajangersakkanut naapertuutinngilaq. Soorlu suliumajunnaarsinnaaneq atorunnaarsinneqarpat, tamanna ILO-p naqisimaneqarani kattuffeqarsinnaanermut qoqassiinertut isigaa, Henrik Karl Nielsen oqarpoq.
Danmarkimi sulisartut kattuffissuata 3F-ip siulittaasuata Poul Erik Skov Christensenip tamanna aamma tupigusuutigeqaa. Taassuma Nunat tamalaat Danmarkimi naalakkersuisunut suliassanngortitsiniarnissaat ilimasaarutigaat. Allakkat pissutsinut pitsaanerulersitsinngillat.
