Suleqatigiinnermi ajornartosiutit ilaasortaajunnaartitsinermut pissutaasut
- Soorunami taama inissinnerput nuanninngilaq. Suleqatigiinnermut tunngasut ajornartorsiuutigaagut, taamaattumik suleqatigiinneq tamaannga killeqassasoq siulersuisuunerni aalajangersimavugut, Hans Enoksen oqarpoq.
Per Rosing-Petersen Partii Naleqqami ilaasortanut allanut arlaleriarluni akerliusarsimavoq.
Avoqqaalliutigineqartoq
Ilaatigut Nunatsinni pissutsit Afrika Kujallermi ammip qalipaataanik immikkortitsilluni apartheidimik aqutsisunut siornatigut assersuuppai.
Aamma atuaruk Per Rosing-Petersenip nunatsinni pissutsit apartheidimut assersuuppai
Aamma atuaruk Enoksen: Sakkortuumik avoqqaarliutigaarput
Tamanna Hans Enoksenip isumaqatiginngilaa, Per Rosing-Petesenillu assersuussinerata kingorna oqariartuutaa sakkortuumik avoqqaalliutigineqartoq, siulittaasup oqaatigaa.
Aamma Telemi pisortap, Kristian Reinert Davidsenip Savalimmiuni ingerlatseqatigiiffiup amigartooruteqarujussuarnerarlugu paragraf 37 naapertorlugu apeqquteqaatimini qanittukkut toqqaannanngitsumik pasillerpaa.
Aamma atuaruk TELE-mi pisortaq Rosing-Petersenimut: Pasilliutit uppernarsaruk
Ilungersunarpallaartoq
Partii Nalerarlu inunnut ataasiakkaanut sulianut piffissaajarusunngitsoq, taamaammallu Per Rosing-Petersenimut suleqatigiinneq kipineqartariaqarsimasoq, Hans Enoksen KNR-imut oqarpoq.
- Politikkikkut ingerlariaqqissagutta taava ilaatigut inunnut ataasiakkaanut tunngasut suliassat tamakkua aallartinneqartartut peqataaffigerusunngilagut, aamma taama sulissagutta partiimut ilungersunarpallaarpoq. Taamaammat Per Rosing-Petersenimut suleqateqarnerput tamaanga killissasoq siulersuisuunerit aalajangerput, Partii Naleqqami siulittaasoq, Hans Enoksen oqarpoq.
Aamma atuaruk Per Rosing Petersen Partii Naleqqamit ilaasortaajunnaarsinneqartoq
Per Rosing-Petersenip Partii Naleqqamit ilaasortaajunnaarsinneqarneratigut partiip Inatsisartunut ilaasortai marluinnanngorput.
Per Rosing-Petersen Inatsisartunut qinersisoqarnerani 115-init taaguunneqarpoq.
Ilaasortaajunnaarsinneqartoq oqaaseqartinniarlugu maanna attaveqarfiginiarsaraarput.
