Enoksen: Sakkortuumik avoqqaarliutigaarput
- Sakkortuumik avoqqaarliutigaarput. Taannalu neriuppunga inuttaata tusaatissatut tigussagaa. Soorunami taamatut ingerlaannartoqassappat taanna aamma partiimi uanga siulittaasutut akuersaarnera soorunami killeqaleriartussaaq, Partii Naleqqami siulittaasoq Hans Enoksen taama oqarpoq.
Nunami inuussutissarsiutit siuarsarnissaat pillugit siunersuummut inuussutissarsiornermut naalakkersuisup, Vittus Qujaukitsup, oqaasiliussamini Israel assersuutissaqqissutut taavaa.
Nunalu Israel maligassiuilluartutut assersuutigineqarnera Partii Naleqqami ilaasortap Per Rosing-Petersenip iluarinngilaa.
- Afrika Kujallermi apartheidimik isorinnissinnaagutta, taava maani pissutsinik isorinnissinnaannginnermik nassueruteqarsinnaanngikkutta ingerlariaqqinnavianngilagut.
- Tassaniipporlu ajornartorsiuterput immaqa annerpaaq, Per Rosing-Petersen Inatsisartut ataatsimiinneranni partiini sinnerlugu oqaaseqarnermini taama oqarpoq, nunarpullu ingerlanneqarnera nunasiaataaneq nutaamut, neokolonialismemut, sanilliullugu.
Aamma atuaruk Per Rosing-Petersenip nunatsinni pissutsit apartheidimut assersuuppai
Partii sinnerlugu taamannak oqaaseqaateqarnera kinguneqassanngilaq. Parteeqatiminnilli isornartorsiorneqarpoq, oqaaseqaataali akuerineqanngitsut, Hans Enoksen erseqqissaavoq.
- Toqqissisimananngilaq. Innuttaasunik pitsaasumik sullissiniarneq tunngavigalugu ingerlarusuppugut, imaanngilaq pinerluuteqarsimasut allallu assigalugit nunarput ingerlatsiffiusoq, taamaanngilluinnaqqissaarpoq.
