TELE-mi pisortaq Rosing-Petersenimut: Pasilliutit uppernarsaruk

Per Rosing-Petersenip, Partii Naleqqameersup, TELE-POSTimi pisortaanerup siornatigut atorfigisimasamini amigartooruteqarnermi akisussaasuunerarlugu oqariartuuteqarnera pineqartumit, Kristian Reinert Davidsenimit, qisuariarfigineqarpoq. 

- Per Rosing- Petersenip savalimmiuni suliffeqarfimmik amigartooruteqartitsisimanera uppernarsassagaa kaammattorpara. Taamaanngippat pasilliutini tunuartittariaqarpaa, Kristian Reinert Davidsen Sermitsiaq.AG-mut oqarpoq. 

Per Rosing-Petersenip §37 naapertorlugu apeqquteqaammini TELE-p pisortaanera siornatigut suliffimmini amigartooruteqarnermut akisussaaneralugu oqariartuuteqareersoq taamak qisuariarneq pivoq.

Kristian Reinert Davidsen naapertorlugu Per Rosing-Petersenip, siornatigut suliffeqarfimmik amigartooruteqarmermi akisussaaneraanera uppernarsaatissaqartinngilaa sumilu amigartoortitsisimanera taanagu.

- Føroya Telemi pisortaanertut sulininni angusarissaarnikuuvunga, TELE-POST-ip pisortaanera oqarpoq.  
 Kristian Reinert Davidsen 2015-imi decemberimi TELE-POST-imi pisortaanertut atorfinippoq, taassuma siorna 2006-imiit savalimmiuni Føroya Telemi pisortaanerusimalluni. 

Sermitsiaq.AG-p allaaserisaa naapertorlugu Kristian Reinert Davidsen Føroya Telemi pisortaanerani suliffeqqarfik 2015-imi 30 millionit koruuningajannik sinneqartooruteqarsimavoq, ukiullu siuliani 50 millionit korunnit sinnerlugit sinneqartoorsimalluni. 

 2009-mili Føroya Telemi  32 millionit koruuninik amigartooruteqarsivoq, tamannali sulifeqarfimmut qarasaasialerisunut aningaasaliisimanermik pissuteqartoq Kristian Reinert Davidsen nassuiaavoq. 

- Amigartooruteqarneq aningaasaliinermi aannaasaqarnermik pissuteqarpoq suliffeqarfiullu ingerlanneqarneranut attuumassuteqarnani, Kristian Reinert Davidsen Sermitsiaq.AG-mi issuarneqarpoq.