Sukap naalakkersuisoqarfianut pisortassasut qinnuteqartut naleqqutinngitsut
Tamanna pissutigalugu Namminersorlutik Oqartussat atorfik inuttassarsiuuteqqinniarlugu aalajangersimasut, Naalakkersuisut siulittaasuata naalakkersuisoqarfiani pisortaq, Søren Hald Møller paasissutissiivoq.
Namminiilivinnermut, Nunanut allanut tunngasunut Nunalerinermullu Naalakkersuisoqarfimmi pisortaq, Kai Holst aprilimi ukioq manna soraarsitaammalli naalakkersuisoqarfik pisortaqarsimanngilaq.
AAMMA ATUARUK Kai Holstimut suli taarsiisussarsisoqanngitsoq
Naalakkersuisoqarfimmilu qaffasinnerpaamik suli atorfeqartoqalinnginnera naalakkersuisoqarfimmut kingunerluuteqarpoq.
- Naalakkersuisoqarfimmi pisortaqannginnera malunnartorujussuuvoq, tassami sulisussat ikinnerupput, Søren Hald Møller oqarpoq, taassumali naalakkersuisoqarfimmi pisortap suliassat suut suliassarinerai oqaatigerusunngilaa.
Naalakkersuisoqarfik maannakuugallaq 18-inik sulisoqartoq naalakkersuisoqarfimmi pisortaanerugallartumit, Jacob Isbosethsenimit isumagineqarpoq.
Namminiilivinnermut, nunanut allanut nunalerinermullu naalakkersuisoqarfimmi pisortatut atorfik qaammammut 69.000 koruuninik akissarsiassartassaqarpoq.
