Kai Holstimut suli taarsiisussarsisoqanngitsoq
Kai Holst Andersen nunanut allanut tunngasunut pisortaqarfimmi ukiuni tallimani pisortaavoq, tamannali Vittus Qujaukitsoq nunanut allanut tunngasunut naalakkersuisutut apriilip naanerani ukioq manna soraarsitaammat aamma killeqarpoq.
Qujaukitsup soraarsitaanera ilutigalugu Holst Andersenip allaffini aamma qimaqqusaavaa.
Nunanullu allanut tunngasunut naalakkersuisoqarfik atorunnaarsillugu naalakkersuisoqarfik allanngorteriffiuvoq, taannalu namminiilivinnermut, nunanut allanut nunalerinermullu naalakkersuisoqarfinngortinneqarluni. Naminnersorlutillu Oqartussat naalakkersuisoqarfimmullu tassunga pisortassarsiorput. Maannamulli tamanna suli iluatsinngilaat.
AAMMA ATUARUK Nunanut allanut pisortaqarfiup pisortaata soraarsitaanera akisuupilussuusoq
Taamaammat naalakkersuisoqarfiup Namminiilivinnermut, Nunanut allanut Nunalerinermullu Naalakkersuisoqarfimmi pisortassarsiornertik saqqummiuteqqippaat.
Pisortanngortussap naalakkersuisoq, Suka K. Frederiksenip ulluinnarni allanngortunik nunatta namminiilivinnissaanut, savaateqarnerup siunissaanik nunattalu nunarsuarmiunut allanut attaveqarnerani suliaqarnerani ikiussavaa.
Atorfimmut inuttassarsiuussinermi naalakkersuisoqarfimmi pisortassap piumasarisat arlaqartut naammassisinnaassagai allaqqavoq. Naalakkersuisumi pisortanngorusukkuit danskisut, tuluttut kalaallisullu oqalussinnaassaatit, nunani tamalaani sulinermik misilittagaqassaatit aammattaaq Naalakkersuisut, Inatsisartut kommunillu akornanni sunniivigineqatigiinnermut ilisimasaqarluassaatit.
