Stina Lundblad seeqqumigut suliaritittussaq: Utaqqisut ikilisaaffigineqalernerat neriunnaqaaq
![](/sites/default/files/styles/image_934x467/public/article_images/master_akutpakke_venteliste_case_jse_still.jpg?itok=6XgjUcnt)
Seeqquusalersinnissamut siffiaasalersinnissamullu utaqqineq sivisuvoq.
72-inik ukiulik, Stina Lundblad seeqqumigut suliaritilluni seeqquusalertinnissaminut ukiuni tallimani utaqqivoq - taassumalu utaqqinerup sivisunera qatsuppaa.
- Siullermik seeqquarlulerama nakorsiarama oqarpoq utaqqisuniipputit suliaritikkiartornissamut seeqquaasalersinnissamut.
- Nakorsiaqqikkama anniarpallaartaqigama oqarfigivaanga seeqquaasalersikkiartussasunga Nuummut, kisianni utaqqisut amerlanermik utaqqeqataasariaqassasunga, Stina Lundblad KNR-imut oqarpoq.
Aningaasaqarnermut akileraartarnermullu ataatsimiititaliaa peqqinnissaqarfimmut pinasuartumik 10 millionit koruuninik aningaasaliinissaq akuersissutigaa. Taakku MR-scannerimik nutaamik pisinissamut aamma seqqumikkut siffissamikkullu suliaritittussat utaqqisut ikilisarnissaannut ilaatigut atorneqassapput.
AAMMA ATUARUK Peqqinnissaqarfimmut pinasuartumik aningaasaliineq: MR-scannerinut nutaaq utaqqinerillu ikinnerit
Stina Lundbladip saniatigut Nuummi Dronning Ingridip Napparsimmavissuani seeqquusalertinnissamut siffiaasalertinnissamullu utaqqisut 409-upput. Nunatta sinnerani utaqqisut arfiniliupput.
Pisulluni ingerlaniartarnini ajornakusoortikkaa
Stina Lundblad Qaqortumi najugaqarpoq, Qaqortumilu qummukajaaqaqimmat majuartarfippassuarmallu Stinap pisunniartarnini ilungersunartippaa.
- Pavani Sivinganikasiani najugaqaratta ammukajaaq sapertarpara, aamma qummukajaaq sapertarpara ajaappiaqaraluaraangamaluunniit, qasugaangama taxanut ikiinartarpunga, taanna oqarpoq.
Taanna Qaqortumi utoqqaat peqatigiiffianni siulittaasuuvoq. Naallu pitsorluttuugaluarluni ilaasortat katerinnissaanut piareersaanerit isumagisarpai.
- Aamma uninngaannaraluaruma qerattassagami, issiavallaaleraangama nikuinniartarnera aamma annernartarpoq, taava angalaqattaarujoorlunga pisorujooqattaarlunga oqiliartortarpoq. Tassa nuannarigakku taamaappoq, ajunngilaq aamma, Stina Lundblad oqarpoq.
Pinasuartumik aningaasaliissutit neriuutissaqalersitsisut
Naak taanna ukiorpassuarni utaqqereeraluarluni Stina Lundbladip Naalakkersuisunit pinasuartumik aningaasaliissutit nutaat utaqqisunut ikilisaataasussat neriuuteqarfigai.
- Taanna tusarlugu nuannaajallannaqaaq, neriunnaqaaq aamma taamak amerlatigisimagutta ikilisaaffigineqalernerat.
Taassumalu suliaritingajalernissani neriuutigaa.
- Neriuutigeqaara pitsorlunnarnermik, ingammik massakkut 73-it tungaannut ingerlalluni tummeqqakkoorneq ajornartarami, tummeqqakkut qummut taavalu aamma ammukajaakkut, Stina Lundblad oqarpoq.
AAMMA ATUARUK Aningaasaliissutit neriuuteqalersitsipput: Nakorsiartartummi utaqqerujussuartarnitik qatsulluinnarpaat
Naalakkersuisut peqqinnissaqarfimmut 10 million koruuninik pinasuartumik aningaasaliipput taakkunannga 3,5 million koruunit Nuummmi napparsimmavissuarmi Dronning Ingridip napparsimmavissuani sulisut amerlanerusut atorfinitsinneqarnissaannut atorneqassapput. Aningaasat tamatuma saniatigut Nakorsap oqarasuaataanut sianertunut amerligaluttuinnartunut atorneqassallutik.