Eqqartuussisuserisoq: - Spiralilersorneqarsimasut taarseeqqusineranni naalagaaffik suliamik kinguarsaavoq
Spiralilersuisimanermi taarseeqqusillutik piumasaqartut 143-it danskit naalagaaffiannit itigartinneqaratillu, qulaajaaneq naammassippat taarseeqqusinerup isummerfigineqarumaarneranik nalunaarfigineqanngillat.
Danmarkimi nunamut namminermut peqqinnissaqarfimmullu ministeria allakkatigut akissumi KNR-imut taama allappoq.
- Taarseeqqusissutit naalagaaffimmit itigartitsissutigineqanngillat, piumasaqarnermilu spiralilersuisimanermik qulaajaanerup naammassisimanissaa piumasaqaataanngilaq.
Spiralilersuisimanermulli suliaq qulaajarneqaqqaartariaqartoq Mads Pramming, Ministeriamit Kammeradvokatimit ikiorserneqartumit akissutisivoq. Kammeradvokati naalagaaffik sinnerlugu suliamik ingerlatsivoq.
Akissullu taanna Naja Lyberthip arnat 143-t sinnerlugit oqaaseqartartutut DR-ip radiokkut aallakaatittagaani P1-Morgenimi ataasinngornermi apersoneqarnerata kingorna Ministeriamit takkuppoq. Naja Lyberth ima oqarpoq:
- Spiralilersuisimanermik qulaajaanerup naammassineqarnissaa naalagaaffiup utaqqeqqaarusukkaa, eqqartuussisuserisutsinnit ilisimatinneqarpugut, eqqartuussisuserisorput Kammeradvokatimit taama paasitinneqarsimavoq. Tamannalu itigartitsinertut isigaarput utaqqinianngilagullu.
Tamannalu Mads Prammingimit radiokkut aallakaatitassiami pineqartumi aamma uppernarsarneqarpoq.
- Arnat pisinnaatitaaffiisa innarlerneqarsimanerat naalagaaffiup nassuerutigiumanagu oqaatigaa. Taarsiillutik akileerusunngillat, qulaajaanermik aallartitsereeramik naammassinissaa utaqqeqqaarusuppaat.
Naalagaaffiup taama nalunaaruteqarnera oktobarimi ataatsimiinnerup kingorna takkussimaneragaavoq.
Eqqartuussisuserisoq: Naalagaaffik suliamik kinguarsaavoq
Mads Prammingillu Danmarkimi nunamut namminermut peqqinnissaqarfimmullu ministereqarfiup akissutaa asuleernertut isigaa.
Taannami isumaqarpoq naalagaaffik kinguarsaariinnarluni paasissutissanik amerlanerusunik piumasaqartoq. Ministeriallu akissutaa 'hokus pokusimik attaveqaqatigiinertut' taavaa.
- Ministeriap oqaasii asuleernerupput. Piumasaqareerpugut aamma spiralilersuinermik suliniuteqartoqarsimanera takussutissaqartipparput. Arnat 143-t kannguttaatsuliorfigineqarsimanerat uppernarsaatissaqartipparput, Mads Pramming KNR-imut oqarpoq.
Spiralilersuisimanermik qulaajaanermi inuit pisinnaatitaaffiinik unioqqutitsisoqarsimanera misissorneqartussaanngitsoq Mads Prammingip ilanngullugu tikkuarpaa. Spiralilerneqarsimasut taarsiivigineqarsinnaanerat qulaajaanermi aamma sammineqartussaanngitsoq ilanngullugu oqaatigaa.
Qulaajaanermi tunngavissat naalakkersuisunit danskillu naalakkersuisuinit isumaqatigiissutigineqarput.
Taamaammallu arnat 143-gallartut inuit pisinnaatitaaffiinik unioqqutitsisimaneq pissutigalugu taarseeqqusinerat eqqartuussiveqarfimmi suliarineqassaaq.
- Eqqartuussisup kannguttaatsuliortoqarsimaneranik taamaammallu taarsiisoqarnissaannik uppernarsaatinik takusimalluni oqaaseqarumaarnera ilimagigatsigu isumalluaqaagut. Pineqartummi aaqqiagiinngissutaat pillugu naapissinnaannginnatta eqqartuussivilersuussivugut, Mads Pramming oqarpoq.
Arnat spiralilersorneqarsimasut taarseeqqusinerat pillugu danskit nunamut namminermut peqqinnissaqarfimmullu ministeriat Sophie Løhde (V) pisortartigoortumik suli maannamut oqaaseqanngilaq.