Naja Lyberth spiralilerneqarsimasorpaaqatinilu allat 140-t Danmarkip naalagaaffianit taarsiiffigineqarnissaminnut piumasaqaataat naalagaaffimmit itigartinneqarpoq.

Naja Lyberth DR-imut taama ilisimatitsivoq. Taanna 14-inik ukioqarluni akuersiteqqaarnani spiralilerneqarsimasunut ilaavoq.

Naja Lyberth DR-ip ullaakkut aallakaatittagaanut P1 Morgenimut ima oqarpoq:

- (Danmarkimi, aaqq.) Naalakkersuisut ilumooruttariaqarpaatigut. Itigartereerpaatigullu.

- Spiralilersuisoqarsimanera pillugu qulaajaasoqarnissaata naammassinissaa utaqqeqqaarneqarniartoq, naalagaaffiup eqqartuussissuserisua aqqutigalugu ilisimatinneqarpugut. Itigartitsisoqarneratulli aamma isigineqarsinnaavoq. Utaqqerusunngilagulli.

Itigartitsisoqarnera arnat eqqartuussissuserisuata, Mads Prammingip, DR-imut tamanna aamma uppernarsarpaa.

Tassa taarsiiffigineqarnissamut piumasaqaat pillugu aalajangiinissaq 2025-mi naammassissangatinneqartumik qulaajaasoqareernerata kingorna aatsaat pissasoq, naalagaaffiup nalunaarutigaa.

Spiralilerneqarsimasorpaat 67-it katillutik 20,1 millionit koruuninik Naalagaaffimmit siorna oktobarimi taarsiivigeqqupput. Taarsiivigeqqusut maanna 140-lersimalerput.

Taama sivisutigisumik utaqqerusunngitsut

Taamali sivisutigisumik utaqqerusunnatik, Naja Lyberth oqarpoq:

- Utoqqaliartorpugut. Utoqqaanersartagut 80-ileereerput. Taakku ukiut marluk utaqqissanngillat. Suliaq una ukiorpassuarni suli ingerlasinnaavoq, taamaammat massakkut iliuuseqartariaqarpugut, nukissaqartilluta iliuuseqartariaqarpugut, taanna DR-imut oqarpoq.

Arnallu taakkua eqqartuussissuserisuat, Mads Pramming, isumaqataavoq.

- Suliani makkunatut ittuni aporfissaqaqaaq. Tuaviunneqartariaqarnera ataasiuvoq, aappaattullu aamma utaqqissunneqartariaqanngilaq. Qulaajaanermi misissugassarpassuaqarmat tamanna ukiunik qulinik sivisusseqarataannaavoq, Mads Pramming oqarpoq.

Danmarkimi naalakkersuisoqatigiit Socialdemokratit, Venstre Moderaternelu, spiralilerneqarsimasut taarsiiffigineqaqqunnerat pillugu suli oqaaseqanngillat. 

Naja Lyberth spiralilersuisimanermik qaammarsaaniaqatinilu arfineq-marluk Danmarkimi inuttut pisinnaatitaaffinnik ilisimatusarfiup ukiut tamaasa nersornasiuttagaanik ukioq manna ullormi nersornaaserneqarfissaanni taama nalunaaruteqartoqarpoq.

Spiralilersuisimanermik qaammarsaaniaqatigiit Naalagaaffiup niviarsiarartatsinnik arnartatsinnillu tuusintilikkuutaanik spiralilersueqqusisimaneranik ukkatarinnnilersitsinerat pillugu nersornaaserniarneqarput.