Arnat nunatsinniittut spiralilersorneqarnermik kinguneranik tarnimikkut anniaatillit telefonikkut siunnersuisarfimmut Tusaanngamut akeqanngitsumik sianerlutik ikiorneqarsinnaapput tarnillu pissusianik ilisimasalimmut innersuunneqarsinnaallutik.  

Spiralilersorneqarsimasummi katsorsarneqarneqarnissaannut naalakkersuisut 800.000 koruuninik 2023-mi tapiissuteqarput.

Arnat ikiorneqarusullutik 2022-mi aasamiit saaffiginnissimasut 77-iusut Isumaginninnermut Aqutsisoqarfik Sermitsiaq.AG-mut siorna septembarimi paasissutissiivoq.

Spiralilersuisimanermili eqqugaasimasut Danmarkimiittut qassioqqissaarnersut ilisimaneqanngitsoq IA-mit folketingimi ilaasortaq Aaja Chemnitz isumaqarpoq.  

- Ilisimasakka naapertorlugit spiralilersuisimanermut tunngatillugu arnat qassit oqaloqateqarnissaminnik katsorsarneqarneqarnissaminnilluunniit pisariaqartitsinersut danskit naalakkersuisuiniit suli paasiniarneqanngilaq.  

Danskit nunamut namminermut peqqissutsimullu ministereqarfiata nittartagaani allaqqavoq arnat tarnip pissusaanik ilisimasalimmik ikiorneqarusukkunik namminneq nakorsartik attavigissagaat imaluunniit Psykiatrifondenip telefonikkut siunnersuisarfia attavigissagaat. Spiralilersuisimanermilu eqqugaasut Danmarkimi Kalaallit Illutaannit ilisimasanik siunnersuinermillu neqeroorfigineqarsinnaasut aamma allaqqavoq.       

Arnalli katsorsartikkusullutik Psykiatrifondenimut aamma Kalaallit Illutaannut saaffiginnissimasut ikittuinnaasut danskit nunamut namminermut peqqissutsimullu ministeriat Sophie Løhde folketingimut ilaasortap Aaja Chemnitzip (IA) apeqqutaanut akissutigaa.    

Spiralilersuisimanermulli tunngatillugu ikiorneqarusullutik atinik isertuussilluni akeqanngitsumik sianerluni siunnersuisarfimmut   saaffiginnittoqarsimanngitsoq Psykiatrifonden KNR-imut paasissutissiivoq.

Kalaallit Illuutaat ikiuunnissaminnik suliakkerneqanngitsut 

Ministerilli akissutaa Aalborgimi Kalaallit Illuutaanni pisortap, Anna Lyngep eqqumiigeqaa.

Kalaallit Illuutaammi spiralilersuisimanermi eqqugaasimasunut katsorsaanissamut neqerooruteqarsinnaanersut danskit oqartussaasuinit attavigineqarsimanngisaannarput.

- Ikiuussinnaannitsinnut tunngatillugu ajoraluartumik saaffigineqarsimanngisaannarpugut. Inunnulliikiorneqarusuttunut siunnersuinissatsinnut piareersimavugut, Anna Lynge oqarpoq.

Arnalli spiralilersorneqarsimasut katsorsartinnissamut periarfissaqarnerat nunamut namminermut inunnillu isumaginninnermut ministereqarfiup nittartagaaneersoq Kalaallit Illutaata Facebookimi quppernermini innersuussutigaa.

Arnat qanoq amerlatigisut katsorsarneqarnissaminnik kissaateqarsimanersut paasiniarlugu nunamut namminermut peqqissutsimullu ministereqarfik Aalborgimi Kalaallit Illutaannut attaveqasimanngitsoq Anna Lynge aamma oqarpoq.  

Spiralilersuisimanerulli kingunerisa oqaluuserineqarnissat arnanit kalaallisut tunuliaqutalinnit Danmarkimilu maanna najugaqartunit pisariaqartinneqaqisoq Anna Lyngep maluginiarsimavaa.

Spiralilersuisimanerummi qulaajaavigineqarnissaanut isumalioqatigiissitameersoq arnanik eqqugaasimasunik apersuisussanngormat soqutiginnittoqaqisoq taassuma uppernarsisimavaa. Ullormilu tassani takkuttoqaaluttoq, taassumalu kingunerani soqutigineqarsimaqisoq, Anna Lynge oqarpoq.  

- Innuttaasut kalaallisut tunuliaqutallit saaffiginnillattaartuarput, ilaatigut arnat aamma taama pineqarsimanerminnik oqaasinnguisarlutik.

Danmarkimi Kalaallit Illutaanni sisamaasuni Aarhusimiittoq kisimi katsorsaanermik neqerooruteqartarpoq. Neqeroorfigineqarsinnaasulli tassaapput meeqqat, inuusuttut aamma ilaqutariit nukangasunik meerartallit nunatsiniit Danmarkimut Jyllandip qeqqanut nooqqammersut.     

Kalaallit Illuutaata Aarhusimiittup arnanik katsorsaanissamut neqerooruteqarsinnaanera pillugu naalagaaffik saaffiginnissuteqarsimanngisaannartoq pisortaq, Tanja Nielsen oqarpoq.

Arnalli spiralilersuisimanermi eqqugaasimasut tarnip pissusaanik ilisimasalimmik oqaloqateqarnissaminnik pisariaqartitsisut taassuma aamma nalilerpaa. 

Politikeri: Spiralilersorneqarsimasunik immikkut ikiuisariaqarpugut

Danmarkimi Kalaallit Illuutaat allalluunniit spiralilersorneqarsimasunik maanna Danmarkimi najugalinnut katsorsaanissamut neqerooruteqarsinnaanissaannut aningaasaliivigineqarnissaat maannamuugallartoq ilimananngilaq.

Sophie Løhde Aaja Chemnitzimut akissummini allappoq: “Arnanik spiralilersorneqarsimasunik katsorsaanissamut neqerooruteqarsinnaanerup annertusinissaanik maannakkuugallartoq pilersaaruteqartoqanngilaq”.

Taassumali arnat katsorsarneqarnissamik kissaateqartut namminneq nakorsaminnut saaffiginneqquai. Danmarkimi nakorsap nakorsiartoq tarnip pissusaanik ilisimasalimmut innersuuppagu, taava tarnip pissusaanik ilisimasallip akissarsiassaata 60 %-ia naalagaaffiup akilissavaa.   

Arnalli qanoq amerlatigisut ikiorneqarnissaminnik pisariaqartitsinersut paasiniarluarneqartariaqartoq Aaja Chemnitz isumaqarpoq. Amerlanngitsut pisariaqartitsippata Danmarkimi Isumaginninnermut Aqutsisoqarfik aaqqiissuteqapallassinnaasoq taanna naliliivoq.

Pisariaqartitsisulli amerlappata akeqanngitsumik katsorsaanermik neqerooruteqarsinnaanissamut IA aamma Folketingimi partiit sinneri aningaasaliissutissarsiupallattariaqarput.  

- Arnat nunatsinniittut Danmarkimiittullu ikiorneqarnissaannut aaqqiissutissaq pitsaanerusoq ujartortariaqaripput isumaqarpunga. Arnat sumiikkaluarunilluunniit assigiimmik ikiorneqartussaatitaapput, Aaja Chemntz oqarpoq.

KNR oqaaseqartitsiniarluni Danmarkimi nunamut namminermut peqqissutsimullu ministereqarfimmut saaffiginnissuteqarpoq, sulili akissuteqartoqanngilaq.

Siumumiit folketingimut ilaasortaq, Aki-Matilda Høegh-Dam, KNR-ip oqaaseqartinniarlugu aamma saaffigaa, taannali aamma akissuteqanngilaq.