Spaniami arnap 113-inik ukiullip coronavirusi anigoraa

Maria Branyas Spaniap avannarpasissortaani utoqqaat illuanni sapaatit akunnerini arlalinni mattuteqqasimavoq. Utoqqaallu tassani najugallit arlallit coronavirusimik toqquteqarsimapput.
Spania nunanut coronavirusimit eqqugaanerpaasunut ilaavoq, tassanimi coronavirusimut attuumassutilimmik toqquteqarsimasutut nalunaarsukkat 27.000-t pallikkaat, Johns Hopkins Universitymit nalunaarsukkani erserpoq. Assi © : Henning Bagger/Ritzau Scanpix
Allattoq Ritzau
maajip 13-at 2020 14:56
Nutserisoq Mads Lynge

Spaniami utoqqaanerpaattut taaneqartartoq, arnaq 113-inik ukiulik, coronavirusimik nappaateqarnerminit aniguivoq.

Maria Branyas, Barcelonap avannaani Olotimi utoqqaat illuanni coronavirusimik apriilimi tunillanneqarpoq. Utoqqaat tassani najugallit arlallit coronavirusimik toqquteqarsimasut, utoqqaat illuat ilisimatitsivoq.

Maria Branyas utoqqaat illuanni tassani ukiuni 20-ni najugaqarpoq, iniminilu mattuteqqalluni coronavirusi anigorlugu.

- Aniguivoq, ajunngilarlu. Sapaatit akunnerata siuliani misissortippoq ajunngilarlu, utoqqaat illuata oqaaseqartartua oqarpoq.

Nualluummik nappaalanersuaqarmat aamma aniguisimasoq

Maria Branyasip utoqqaat illuanni sulisut ajunngisaarneraqalugit videoliami nersualaarpai.

Sulisut arnaq taanna 113-inik ukiulik aperivaat taama inuuneqqortutiginissamut suna aqqutissaanersoq. "Peqqissuunissaq pingaaruteqarpoq", Maria Branyas akivoq.

Arnaq taanna 1907-imi inunngortoq nualluummik nunarsuarmi 1918-imi 1919-imilu nappaalanersuaqarmat niviarsiaraalluni aamma aniguivoq.