Nalunaaruteqarnerminni marluullutik qulakkeerumavaat, oqaloqatigiinnikkut imminnullu paasititseqatigiittarnikkut sorsuttoqaratarsinnaanera annikillisartassallugu.Assi: Sputnik/Reuters/Ritzau Scanpix

Sorsuttoqaratarsinnaanera annikillisarnissaa Bidenip Putinillu isumaqatigiissutigigaat

USA-p Ruslandillu præsidentiisa nalunaarutiminni sakkunik nakkutiginninnerunissamik tamarmik oqariartuuteqarput.

Sakkussanik nakkutiginninnerunissaq, USA-p Ruslandillu præsidentiisa Genevemi ippassaq pingasunngornermi ataatsimiinnermi isumaqatigiissutigaat.

Præsidentit Schweizimi Genevemi ataatsimeereerlutillu timmisartuminnukaleruttortut, atorfilittaasa præsidentit ataatsimoorullugu nalunaarusiaat tamanut saqqummersippaat.

Nalunaarut sakkunik nakkutiginninnerunissamut tunngavoq. Sorsuttoqaleratarsinnaanerata annikillisarnissaanut tunngalluni.

USA Ruslandilu nunarsuarmi nunani atomimik qaartartorsualiaateqarnerpaapput.

AAMMA ATUARUK EU-p USA-llu russit Navalnyj-p toqunartutortinneqarsimasimanera pillugu pillaraat

Nunani assigiinngitsuni sorsuttoqaleratarsinnaaneranut aarlerisoqarnerani tamanna siulittuuteqarfigipajaarneqarsinnaasutut isikkoqartut, præsidentit marluk taakku nalilerpaat.

Sakkuaattoqaleratarsinnaanerata annikillisarneqarsinnaanissaa tassuunatigut qulakkeerneqartoq , atomimillu sakkussiarsuit atorneqannginnissaannut aarlerinaat annikittuinnaalluni, oqarput.

Sorsunnerup nillertup nalaani ajoqersuutitut oqaatigineqartartoq nalunaarusiami ilaatinneqarpoq:

- Atomimik qaartartorsuarnik atuilluni sorsunnermi ajugaasoqarneq ajorpoq, sakkullu taakku atorneqassanngillat.

Assigiinngitsunik eqqartugaqarput

Sakkussiat ineriartortitat nutaat nakkutigineqarnerunissaat pillugu sakkutuuliinernut immikkut ilisimasallit nunanit taakkunaneersut naapeqatigiinnissaat Biden Putinillu isumaqatigiissutigisimagaat, Bidenip tusagassiortunut sassarnermi oqaatigaa.

Bidenillu Putinillu Genevemi akunnerni sisamani ataatsimiinnerminni eqqartugaat assigiinngitsorpassuupput.

Qarasaasiat internetilu aqqutigalugit nunani tamalaani saassussisarnerit akiorniarneqarnissaat aamma isumaqatigiissutigineqarpoq.

AAMMA ATUARUK Isornartorsiuisoqareersorlu Ruslandip aallartitaa angerlartitaasoq

Rusland USA-mik taamatut saassussisartoq USA-p pasilliutigaa, USA-mi suliffeqarfiit oqartussallu allaffeqarfii saassunneqartarnerarlugit.

Inuit pisinnaatitaaffii, Ruslandimi naalakkersuisunut illuatungiliuttup Aleksej Navalnyj-p pisisinnaatitaaffii, eqqartorneqartunut ilaasut, Bidenip oqaatigaa.

Navalnyj parnaarussaaqqavoq napparsimallunilu.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat