Isornartorsiuisoqareersorlu Ruslandip aallartitaa angerlartitaasoq
![](/sites/default/files/styles/image_934x467/public/article_images/20210317-200626-l-1920x1502we.jpg?itok=m-sLocod)
Ruslandip USA-mi qinersisorneranut akuliunnera kinguneqarumaarpoq. Ruslandillu præsidentianut Vladimir Putinimut aamma kinguneqarumaarpoq.
USA-p præsidentia Joe Biden USA-mi tv-qarfimmit ABC-mit apersorneqarluni pingasunngornermi taama oqarpoq.
Putin toqutsisuusutut isigineqarsinnaanersoq Biden aperineqarami aamma anngaavoq.
Ruslandip tamanna akuersaarumanngilaa, USA-mullu aallartitani Anatolij Antonov, Ruslandip USA-llu attaveqaqatigiinnerat pillugu Moskvami nalilersueqatiginissaanut Ruslandimut angerlartillugu.
AAMMA ATUARUK Rusland afviser nye anklager om at blande sig i USA's valg
Ruslandip USA-mik attaveqarniarnerata aaqqinneqaqqissinnaanngitsumik innarlerneqarnissaa Ruslandip pinngitsoortinniarpaa. Ruslandip nunanut allanut tunngasunut Moskvami ministereqarfia taama nalunaaruteqarpoq.
USA-mi præsidentimut siorna qinersisoqarnerani præsidentiusimasup Donald Trumpip angusarissaarnerunissaa pillugu Ruslandip qinersinermut akuliunnera Putinip ilisimasimagaa, akuliunnerlu aqussimagunaraa, isertortumik paasiniaasartut nalunaarusiaanni inerniliunneqarpoq.
Trump præsidentimut qinersinermi Bidenimut novembarimi ajorsarpoq.
Rusland qinersineq pillugu paasissutissanik ilumuunngitsunik siammarteriniarsimasutut nalunaarusiami ilaatigut allaaserineqarpoq.