EU-p USA-llu russit Navalnyj-p toqunartutortinneqarsimasimanera pillugu pillaraat
Ruslandimi atorfilittat nuimasut arlallit EU-mit USA-miillu immikkut ittumik sukannersumillu marlunngornermi iliuuseqarfigineqarput.
Inuiaqatigiit aaqqissuussaanerannik isornartorsiuisoq, Aleksej Navalnyj, toqunartutortinneqarluni toqoriaraluarneqareersorlu taama pisoqarpoq.
Ruslandimut immikkut ittumik sukannersummillu iliuuseqartoqassasoq, EU-mi nunat nunanut allanut tunngasunut ministeriisa sapaatit-akunnerata siuliani ataasinngornermi aalajangerpaat.
USA assingusumik marlunngornermi iliorpoq. Præsidentip Washingtonimi illorsuani atorfilittat nuimasut tusagassiortunik attaveqaatit aqqutigalugit katersuutsitsinermi taama oqarput.
AAMMA ATUARUK EU-p ministeriisa russit Navalnyj-mik parnaarussinerat pillugu pillarniaraat
EU-p Ruslandimut iliuuserisai Ruslandimi najugalinnut sisamanut eqquivoq. Aleksander Bastrykin taakkununnga ilaavoq. Taanna misissuisartut ataatsimiititaliaanneersuuvoq. Ataatsimiititaliaq taanna Ruslandip præsidentianut Vladimir Putinimut toqqaannartumik attaveqartarpoq.
Navalnyj Ruslandimit saassunneqarluni toqoriaraluarneqartoq, Naalagaaffiit Peqatigiit ataanni immikkut ilisimasallit marluk ataasinngormat inernilerpaat, toqunartoq Novitjok atorlugu ersiortitsiniartoqarneranik taallugu.
Inuit ataasiakkaat assersuutigalugu nunarsuarmioqatigiinnut pinerluuteqarsimappata inuttulluunniit pisinnaatitaaffinnik allatigut unioqqutitsisimappata, immikkut ittumik sukannersumillu iliuuseqarfigineqarsinnaanissaat malittarisassani nutaani allassimavoq.