Somaliami akersuuttoqalernissaa aarleqqutigaat

Somaliap naalagaaffittut naalakkersorneqarsinnaajunnaarnissaa aarleqqutigineqarpoq. Etiopiamiut sakkutuutik ukiortaamiit angerlartippatigit inuiaat imminnut akersuutilerpata tuusindilippassuit qimarratilersinnaapput.
Allattoq Najaaraq Egede
decembarip 22-at 2008 10:51

Somaliamiut miliuunit sinnillit angerlarsimaffimminniit qimaaqqapput, amerlanerit saniliminni Kenyami qimaasut katersuussimaffianniillutik. Somaliallu kujasinnerusortaani islamisiortut pissaaneqarnerusut islamisiortuunngitsunik takorusunngillat. Illoqarfiit pingaarnersaanni naalakkersuisuuniaraluit pissaaneqanngillat, præsident Abdullah Yossoufip ministeriuneq, Hassan Hussein tunuartitaasimaneraraluaraa naalagaaffinnit saniliiniit USA-miillu tamanna ilumuunnginnerarneqarpoq. Islamisiortulli ukiut marluk matuma siorna Mogadishumut isaallutik pissaaneqarnialermata Etiopiamiut sakkutuui akersuukkiartortinneqaraluartut maanna angerlartinneqarniaannalerput. Islamisiortullu Somaliap kujasinnerusortaani pissaaneqarnerujartuinnartut malunnarpoq, Mogadishullu avatinnguani isaanissaminnut piareeqqallutik. Afrikami naalagaaffiit peqatigiit Somaliami pisut ataatsimiissutigereerlugit Nigeria sakkutuunik 850-nik aallartitaqarniarluni nalunaarpoq. Ugandamiut Burundimiullu sakkutuuminnik Somaliamiititaqartut amerlanerusunik sakkutuuliissamaarput. Pissangassutigineqartorli tassa eqqissisimatitsinissamut sakkutuut naammassanersut

sulilu islamisiortut akiorniarlugit periarfissaqarnersut.

Islamisiortut Somaliami pissaaneqalernissaat saniliisa, minnerunngitsumilli USA-p, peqqarniisaarniat katersuuttarfigileqinammassuk aarleqqutigaat. Taamaammat naalakkersuinermik suliallit nuimasut piaartumik pissutsinut sunniuteqarniarsaripput.