Socialdemokraatineersoq: Aleqa Hammondimut tatiginninneq millivoq
- Attaviitsunngornerani partiimut ilaasortaaneranut naleqqiullugu tatigeqatigiinneq allaanerussaaq.
Kalaallit Nunaannut tunngasunut oqaaseqartartoq Karin Gaardsted, Aleqa Hammond suli tatigineraa KNR-imit aperineqarami taama akivoq.
Attaviitsup Kalaallit Nunaannut tunngasunut ataatsimiititaliami, Socialdemokraatit ilaasortaatitaaffiisa ilaanni, siulittaasup tulliatut ingerlaannarnissaa, Aleqa Hammondip Folketingimi allattoqarfiata sisamanngormat nalunaaruteqarnerata kingorna tamanna pivoq.
Aamma atuaruk Socialdemokraatit Aleqa Hammond suleqatigiunnaaraat
Aleqa Hammondip Siumumit ilaasortaajunnaarsinneqarnera pissutigalugu partiip Folketingimi gruppianiissinnaajunnaartoq Socialdemokraatit sapaatit-akunnerata siuliani nalunaarutigigaluarpaat.
- Tamanna pissutigalugu Socialdemokraatit gruppiannit aamma anisussanngorpoq, tassunga ilaasortaanera Siumumi ilaasortaanissamik piumasaqaatitaqarmat, Henrik Sass Larsen DR-imut taama allappoq.
Oqaaseqartartoq: Aleqa tunuarsimasariaqaraluarpoq
Aleqa Hammond tusagassiorfinnut marlunngormat nalunaaruteqarluni allappoq inatsisit pillugit ataatsimiititaliami, nunanut allanut ataatsimiititaliami aammalu illersornissamut ataatsimiititaliami ilaasortaaffini annaallugit, Nunarpulli pillugu oqaluuserisassaqartillugu Socialdemokraatit issiavissaat atorsinnaajuaannartussanngorlugit Socialdemokraatit isumaqatigiissuteqarfigisimallugit.
Socialdemokraatit Aleqa Hammondillu isumaqatigiissutaata siulliup nutaallu sutigut allaanerussuteqarnerat Karin Gaardstedip, Kalaallit Nunaannut tunngasunut ataatsimiititaliaq peqatigalugu Nunatsinni maannakkorpiaq ilisimasassarsiorluni angalasup, oqaaseqarfigerusunngilaa. Socialdemokraatini siuttut innersuussutigai.
Aleqa Hammondilli atornerluilluni kanngunartuliornini kingulleq pissutigalugu Folketingimit tunuarsimasuuppat pitsaanerusimassagaluartoq oqaatigaa.
Aamma atuaruk Lars Emil: Aleqap Folketingimiiginnarnera erloqinarpoq
- Uanga nammineq isumaga naapertorlugu, partiimit ilaasortaajunnaarsinneqarsimagaanni, taava ilaasortaaffik (Folketingimi, aaqq.) sinniisussamut tunniunneqartariaqaraluarpoq, Karin Gaardsted taama oqarpoq, attaviitsumillu Kalaallit Nunaannut tunngasunut ataatsimiititaliami suleqateqarnini ima oqaasertalerpaa:
- Suleqatigiinnerup siunissami qanoq innissaa oqaatigiuminaappoq. Hammondip ataatsimiititaliami ilaasortaaffini qanoq eqeersimaartigisumik, qanoq sulilluartiginermigut qanorlu ilungersuutigitigissaneraa apeqqutaassaaq.
Aleqa Hammondip nutaamik suleqatigineqartussanngornera pillugu Socialdemokraatit siuttui Siumumilu siulersuisuunerit oqaaseqartissinnaasimanngilagut.
