Tassaarsuaqarataannaanera: Uummannami peqqissaaviup qanoq pineqarnissaa nalunartoq

Jens Kristian Therkelsenip Naalakkersuisut pingasunik apeqquteqarfigai, apeqqutaalu tamarmik assigiimmik akineqarput.

Apeqqut siulleq imaappoq: 'Uummannami peqqissaaviup nutaamik taarserneqarnissaanik Naalakkersuisut pilersaaruteqarpat?'

Uummannap eqqaani Karrat Kangerluanni ajornerpaamik pisoqarluni tassaarsuaqassagaluarpat Uummannami peqqissaavik sissap killinganiittoq 2017-imi tassaarsuaqarnerani malissuartulli ittunit qaarussaariaannaammat, apeqqutip taassuma erseqissumik akineqarnissaa pingaaruteqarluinnarpoq.

AAMMA ATUARUK Nakorsaq Uummannami Peqqissaavik pillugu: Pilersaaruteqarpugut

Peqqissutsimut naalakkersuisoq Inuit Ataqatigiinneersoq, Mimi Karlsen, Jens Kristian Therkelsenip apeqqutaanut aappimik/naaggamilluunniit akisassamut ima akissuteqarpoq:

- Naalakkersuisut Uummannap eqqaani tassaarsuaqarsinnaanera ilisimaaraat. Susassaqarfimmut attuumassuteqartut pisortaqarfiit oqaloqatigineqarnerat aallartisarnikuuvoq, tamatumani Uummannami peqqinnissaqarfik misissorneqarnissaa siunertarineqarpoq.

Tassa Karrat Kangerluanni qaqqaq nakkaariaannaasoq Uummannamilu peqqissaavik malissuarnit qaarussaariaannaasoq, Naalakkersuisut ilisimaaraat. 
Oqartussallu taamaattoqariaannaaneranik oqaloqatigiilereerput.

Uummannami nutaamik peqqissaaviliornissap qanoq akeqarnissaanik qaqugulu sanaartortoqalernissaanik missiliuisoqarsimanersoq, taassuma Naalakkersuisunut ilaatigut aamma apeqqutigaa. Naalakkersuisulli akissumminnut siullermut innersuutiinnarpaat.

Qaqqaq qaqugukkulluunniit nakkaarataannaasoq

Ujarassiuut qaammataasaniit assinik sapaatit akunnerannut qasseeriarlutik pissarsisartut, taamaalillutillu sumiiffik nakkutigigaat aammali nalinginnaanngitsumik nikingaatsiartaraluartoq qaqqap ilarujussua qaqugu nakkaarataannaannersoq siulittoruminaattoq, KNR 2021-mi maajimi allappoq.

Tamanna aqagu ukiulluunniit 200-t qaangiuppata perataannaavoq.

Ataaserli qularnanngilaq: Sumiiffiit aarlerinarluinnartut qassiiusut, ujarassiiuut oqaatigaat.

Karrat Kangerluanni qaqqaq nakkaarataannaasoq ataatsikkut nakkaraluarpat inoqarfinni soorlu Qaarsuni Niaqornanilu malissuaqarnissaa aarlerisaarutaasoq, KNR siorna maajimi allappoq.

Uummannamilu peqqissaavik malissuarnit qaarussaarataannaasunut aamma ilaavoq.

Taamaammallu ataaseq alla aamma qularnanngilaq: Jens Kristian Therkelsenip Mimi Karlsenimit akissutisiani naammaginartinngilluinnarpaa. Taamaammat Naalakkersuisunut tamanna pillugu aappassaanik apeqquteqaateqarpoq.

- Neriuppunga tassuunakkut sukumiinerusumik akissummik pissarsisinnaassallunga, Jens Kristian Therkelsen KNR-imut oqarpoq.

AAMMA ATUARUK Alapernaarsuineq Karrat kangerluani qaqqamik qajannartumik misissuutaassasoq

Taassuma ilumoorussinerusumik pitsaanerusumillu akissuteqarfigineqarnissani neriuutigalugu apeqqutit itisilerlugit nassiuppai.

Naalakkersuisoqatigiit akerleriinngitsut

Jens Kristian Therkelsenip partii ilaasortaaffigisaa, Siumut, taavalu Inuit Ataqatigiit naalakkersuisoqatigiipput. Taassumalu naalakkersuisut akissutaannik naammaginninnginnera naalakkersuisoqatigiit akerleriinnerattut paasisariaqanngitsoq, taanna oqarpoq.

- Soorunami naalakkersuisoqatigiippugut, aammalu naalakkersuisoqatigiinni suleqatigiinni ajunngitsumik ingerlasoq nalilersinnaallugu. Kisiannili neriuppunga sukumiisumik akissutinik periaruma aammalu siunnerfik ersarinnerulerpat, naatsorsuutigilluinnarpara partiit naalakkersuisuutitaqartut arlaatigut aamma oqaloqatigiinneri tassunga tunngasut ingerlanneqarumaartut.

Nutaamik toqqissisimanarnerusumillu peqqissaaveqalernissaa ilungersuutigiinnassagini, taanna erseqqissaavoq:

- Naalakkersuisut akissutissaat qanoq ikkumaarnersoq paaseriarlugu ingerlateqqiinissara arlaatigut tassunga tunngatillugu malersuinissara qularutigineqassanngilaq, Jens Kristian Therkelsen oqarpoq.

KNR-ip Mimi Karlsen feeriassaqarluni sulinerminut atatillugu maanna angalasoq attaveqarfigaa. Tassaarsuaqarataannaanera eqqarsaatigalugu Naalakkersuisut Uummannami sooq nutaamik suli peqqissaaviliulersaarsimanngitsut, KNR-ip ilaatigut apeqqutigaa.

AAMMA ATUARUK Ujarassiooq Karrat Kangerluat pillugu: 2017-imi pisumit ajornerujussuusinnaavoq

Mimi Karlsenilu ima akivoq:

- Paasisavut tunngavigalugit qanoq iliuuseqarnissarput pingaaruteqarpoq, tassaarsuaqarataannaanerali eqqarsaatigalugu Uummannami peqqissaaviup isumannaallisarnissaanut sorpiaat suliniutaassanersut, misissuinermi kingullermi taaneqanngilaq. Taamaammat atorfilittakka tassaarsuaqarataannaaneranut tunngasunik paasissutissanik amerlanerusunik pissarseqqullugillu sunik suliniuteqartoqarsinnaaneranik paasiniaaqquakka.

Jens Kristian Therkelsenillu itisilerlugit apeqquteqaatai sapinngisamik piaarnerpaamik akiumaarini, taanna aamma ilisimatitsivoq. 

- Apeqquteeqaatai ingammik qanoq qaqugulu misissueqqissaarisoqassaneranut tunngapput. Oqaatigeriikkattullu misissueqqissaarisoqalereerpoq, nutaamilli peqqissaaviliortoqassaneranik peqqissaaviliortoqannginnissaanilluunniit eqqortumik naliliisoqarnissaa qulakkeerniarlugu misissueqqissaarinerup tuaviuutigineqannginnissaa pingaaruteqartoq, Mimi Karlsen KNR-imut allappoq.

Uummannamilu nutaamik peqqissaaviliortoqassappat tamanna qaqugu aallartissanersoq oqaatigisinnaanngikkitsik, Mimi Karlsenip KNR-imut aamma akivoq.