Alapernaarsuineq Karrat kangerluani qaqqamik qajannartumik misissuutaassasoq
Uummannap avannaani Karrat kangerluani qaqqamit sisoortoqangaatsiarneranit nunaqarfiillu Illorsuit Nuugaatsiallu tassaarsuaqarfiuneranit ukiut tallimat qaangiunneranni qaqqat qajannartut arlallit maanna misissorneqassapput.
Misissuinermi alapernaarsuinermut atortut atorneqassapput, taakkunannga silap pissusaanik, sajunnernik, qaqqami qajannartortaqartumi Karrat 3-mi pissutsit nutaat erseqqissarneqartassapput.
Tassaarsuaqarneranut takussutissat nalinginnaasut
Sumiiffinni tamani tassaarsuartoqarneranik aarlerisaarisoqartillugu aarlerisaarinerit ilumoorunneqartassapput. Tassaarsuaq sineriammut apuuppat imaq nalinginnaasumit tininnerujussuussaaq imaluunniit imaq annertoorujussuarmik ulissaaq.
Soorluttaaq taamatut pisoqarnerani qimmit eqqissiveerussinnaasartut. Taamatut aarlerinartumik malussarniaraanni piaartumik sissaq qimanneqartariaqarpoq. Nalinginnaasumik sissamit qummut qatsissumukarlutit ingerlasassaatit. Meterit qullarterfitit tamaasa annassutigisinnaavatit.
Paasissutissarsiffik: Namminersorlutik Oqartussat
Tamanna aarlerisaaruteqarsinnaanissamut atortunut atorneqarsinnaasunik qaqqat eqqaanilu pisut pillugit nutaamik ilisimasaqalersitsisinnaanissaa neriuutaavoq.
Aatsitassanut Inatsisillu Atuutsinneqarnerannut Naalakkersuisoqarfik taama paasissutissiivoq.
Paasissutissat qaammataasiatigut nassiunneqartassasut
Namminersorlutik Oqartussanit, GEUS-imit, Tusassimit, Asiamit nunanilu tamalaani immikkut ilisimasallit suliaqartuussapput.
Taakku qaqqat qajannartut timmisartuaqqat inuttaqanngitsut atorlugit misissuillutillu Karrat 3-mi 800 meterimik portutigisumi alapernaarsuinermut atortunik pilersitsissapput.
Alapernaarsuiffimmit paasissutissat qaammataasiatigut suliaqartunut nassiunneqartassapput.
- Alapernaarsuinermut atortunut siunertaavoq pisut qaqqani qajannartortalinni aallartitsisartut sunniisartullu ingerlasarnerinut tunngatillugu ilisimasaqalernissaq, Aatsitassanut Inatsisinillu Atuutsitsinermut Naalakkersuisoqarfik tusagassiuutinut nalunaarummi allappoq.
- Ilisimasat taakkua takorluukkanik aarlerinaataasunillu nalilersuinernik nutartikkanik suliaqarsinnaalersitsissapput. Paasisimasaqalernissaq pisariaqartoq anguneqarniariarpat, alapernaarsuinermut atortut ilimasaarinermut aamma/ imaluunniit kalerrisaarinermut atortunngortinneqarsinnaanissaat naggataatigut siunnerfigaarput, naalakkersuisoqarfik allappoq.
Aamma Kangerluarsuup qaqqaani Kigarsimami qaqqaq qajannartoq erseqqinnerusumik aamma misissorneqassaaq.
AAMMA ATUARUK Uummannap kangerloqarfiani qaqqat qajannartut pillugit tassaarsuarmut najoqqutassiaq nutaaq eqqornerusorlu
Norgemiut ilisimatusartut arlallit Kigarsimami qaqqamit sisoortoqassagaluarpat pissutsit qanoq innissaat pillugit qanittumi nalilersuipput.
Taamaammat mallit qanoq portutigisinnaanissaat qaqqamiillu sisoortoqarneranit mallit siulliit nunaqarfinnut illoqarfimmulluunniit ataasiakkaanut anngunnissaanut piffissaq qanoq sivisutigisinnaanersoq maanna takuneqarsinnaavoq.
Assersuutigalugu Kigarsimami qaqqamit sisoortoqassagaluarpat mallit siulliit Ukkusissanut minutsit tallimaannaat ingerlanerani anngutissasoq naatsorsuinerit takutippaat.