Ujarassiooq Karrat Kangerluat pillugu: 2017-imi pisumit ajornerujussuusinnaavoq
Karrat Kangerluani qaqqaq ulorianartorsiortitsinerpaaq ataatsikkut sisuussagaluarpat malissuit Nuugaatsiami Illorsuarnilu 2017-imi tassaarsuartoqarneranit aqqaneq-marloriaammik 13-eriaammilluunniit portunerussasut, GEUS naliliivoq.
- Ajornerpaarpaamik pisoqassagaluarpat taamaattoqassaaq.
GEUS-imi ujarassiooq Nina Skaarup oqarpoq.
Karrat Kangerluani 2017-imi qaqqap sisoortup tassaarsuarmillu pilersitsitsup, qaqqat sisooriaannaat allat ungasinngisaanniittut misissuisut nunatsinneersut, Danmarkimeersut Norgemeersullu saqqummiuppaat.
Ajornerpaamik pisoqarnerani sumiiffik 3-mik nalunaaqutsersimasoq ataatsikkut sisuussaaq.
Taannalu sisooraluarpat nunaqarfiit arlallit eqqorneqassapput.
Karrat Kangerluanni piffiit pingasut aarlerinaateqartut
Nunatsinnit, Danmarkimit Norgemiillu ujarassiuut Karrat Kangerluani piffiit pingasut aarlerinaateqartutut oqaatigaat. Taakku qaqqami 2017-imi nakkaasoqarneranit tassaarsuaqartitsisumut qanittumiipput. Piffiit assimi normu 1, 2, 3-millu nalunaarsorsimapput. Piffik 3-mik nalunaaqutsersimasoq ataatsikkut nakkaassagaluaruni ajornerpaamik pisoqarsinnaavoq.
- Qaqqaq sisooqqissappat malissuit Karrat 3-mik nalunaarsukkamiittut 2017-imi tassaarsuaqarneranit aqqaneq-marloriaammik 13-eriaammilluunniit portunerussapput.
GEUS-imi ujarassiooq Nina Skaarup oqarpoq.
Ajornerpaamik pisoqassagaluarpat nunaqarfiit eqqugaasuussat tassaapput: Qaarsut, Niaqornat, Uummannaq, Saattut, Ukkusissat Ikerasaallu ilaa.
Kiisalu 2017-imi matuneqartut Illorsuit Nuugaatsiarlu.
AAMMA ATUARUK Katrine Kruse Hansen Niaqornaneersoq: Maani najugaqaannassaanga
- Assersuutigalugu Nuugaatsiami 2017-imi tassaarsuartoqarmat mallit 6 meteriniit 10 meterit tungaanut portutigipput. Karrat 3 tamarmi sisuussagaluarpat mallit 37 merterit 74 meterillu akornanni portutigisinnaapput. Malerujussuupput, ujarassiooq nassuiaavoq.
Angerlarsimaffiit 176-it eqqugaasinnaasut
Malinnit anguneqarsinnaasutut taaneqartut tassaapput tassaarneranit maliup timmut angusinnaasaa qutsinnerpaaq. Tassa sumiiffiit maliit angusinnaasaat.
Karrat Kangerluanni qaqqami ulorianartorsiortitsisumi nuna ataatsikkut sisuussaguni innuttaasut 176-it eqqugaassapput.
Taamammaat innuttaasut nuukkusukkunik ikiorneqarsinnaasut Naalakkersuisut neqeroorutigaat.
Nuunnissamut neqeroorummut akuersisut Avannaata Kommuniata ikiuineratigut inissiamik attartugassarsissapput.
AAMMA ATUARUK Karrat Kangerluat pillugu naliliineq nutaaq: Innuttaasut 176-it piumagunik nuunnissamut neqeroorfigineqartut
Qaqqaq ulorianartorsiortitsisoq qaartiinnarneqarsinnaanersoq allatulluunniit ulorianarnera annikillisaavigineqarsinnaanersoq ujarassiooq ilanngullugu aperaarput.
- Qaqqaq qaartiinnarsinnaannginneripput arlaleriarluni apeqqutigineqartarpoq. Taamannak qaartitsineq misilittagaqarfigaarput, uanili iluatsinnavianngilaq. Tassami imaakkami sumiiffiit allat aalaqqajuttunngortinneqarsinnaammata. Assersuutigalugu Karrat 1-imi 2-milu qaqqat 2017-imi tassaarsuaqareermat sisooriaannaanngorsimasut ilimagilluinnarparput, GEUS-imi ujarassiooq Nina Skaarup oqarpoq.