Katrine Kruse Hansen qaqqamit sisoortoqaratarsinnaanera Niaqornanut ulitsisinnaasoq pillugu innuttaasunut ataatsimiititsinermut peqataaqqammerpoq.Assi: Kruse Katrine

Katrine Kruse Hansen Niaqornaneersoq: Maani najugaqaannassaanga

Naak Karrat Kangerluanni qaqqamit annertuumik sisoortoqaratarsinnaagaluartoq Katrine Kruse Hansen ernumanngilaq.

- Qanoq pisoqarsinnaanersoq taanna paasivara. Kisianni ulluinnara uanga ingerlavoq taamatuinnaq.

Katrine Kruse Hansen Niaqornaneersoq taama oqarpoq. Taanna qaqqamit sisoortoqaratarsinnaanera Niaqornanut ulitsisinnaasoq pillugu innuttaasunut ataatsimiititsinermut peqataaqqammerpoq.

- Ernumalinngilanga aamma imatut ataatsikkorsuaq pisussaq annertusinnaagaluartoq neriuutigiinnarlugu taamarsuussanngittoq.

 

Billede: Katrine Kruse Hansen.

Nunaqarfimmi Uummannap kitaaniittumi innuttaasut 36-t missaanniipput. Karrat Kangerluannilu qaqqamit annertuumik sisoortoqassagaluarpat mallit 3,8 meterinik portussuseqartut Niaqornat eqqorsinnaagaat, norgemiut immikkut ilisimasaqartuisa nalilerpaat.

AAMMA ATUARUK Karrat Kangerluat pillugu naliliineq nutaaq: Innuttaasut 176-it piumagunik nuunnissamut neqeroorfigineqartut

Qaqqaq ulorianartorsiortitsinerpaaq ataatsikkut sisuussagaluarauni innuttaasut 176-it missaanniittut tassaarsuaqarneranit eqqugaasinnaapput. Tassaarsuarneratalu Qaarsut, Niaqornat, Saattut, Ukkusissat Ikerasaallu taavalu Uummannap ilai eqqortussaavai.

Innuttaasut pineqartut najukkaminni najugaqaannassanerlutik imaluunniit nuunnissaminnut ikiorneqassanerlutik namminneq aalajangersinnaatitaavaat.

Taamaammat Naalakkersuisut nunatta avannaanut ernumanartunik paasissutissanik ingerlatitseqqikkiartorlutik sapaatip akunnerata matumani angalapput.

Katrine Kruse Hansen innuttaasunut ataatsimiititsinermi ualeq manna malinnaavoq.

Taassumali tamanna ernumassutiginngilaa.

-  Annertunerusinnaanera maluginiarpara. Kisianni ikiorluarneqarniarsarisorujussuugatta imatorsuaq ernumassutissaqarujussuanngilanga imminut eqqarsaatigissaguma. Soorunami utoqqaat pitsorluttut ernumasinnaappata tupiginngilara.

AAMMA ATUARUK Tassaarsuaqarsinnaaneranik naliliineq nutaaq: Illut, nukissiorfiit peqqissaavik eqqugaaratarsinnaasut

Taannami ajornerpaamik pisoqassagaluarpat iliuuseqarfigineqarumaarlutik Naalakkersuisunit aallartitanit neriorsorneqarpoq.

- Soorlu qimaariataassagutta tamakku atortulersuutissat tupiusinnaapput qummut majuassagutta, nerisassat, Iridiummit sorpassuillu tamakku qimaariataarnermut atortulersuutaasinnaasut taavalu tamakku orniguttussat politiit qatserisartut allallu ikiuuttussat sorpassuit neriorsuutigiortorneqarput. Taavalu aamma tamakku alarmikujunnik tunngasut iluamik misissoqqissaarneqassapput. Aamma pisariaqassappat aaqqissugassartaa aaqqissornerullugit, Katrine Kruse Hansen oqarpoq.

- Sumiikkaluaruttaluunniit tusaasinnaassassatsinnut alarmimik.

Naalakkersuisut innuttaasut Niaqornani najugaqartut toqqissisimanngikkunik allamut nuunnissamut aamma periarfissippaat. Katrine Kruse Hansenili angerlarsimaannarniarpoq.

- Uanga imatut ernumasorujussuunnginnama naatsorsuutigaara maaniiginnarsinnaassallunga.

Allammi nuukkaluarpata qanoq iliussavit?

- Apeqqutaajumaarpoq, siumungaaq massakkut eqqarsaateqanngikkallarpunga allamik.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat