Tassaarsuaqarsinnaaneranik naliliineq nutaaq: Illut, nukissiorfiit peqqissaavik eqqugaaratarsinnaasut

Naalakkersuisut Karrat Kangerluanni qaqqamit sisoortoqarsinnaaneranik naliliinermik nutaamik pissarsipput. Ajornerpaamik pisoqarnerani illut, nukissiorfiit peqqissaavillu Uummannamiittoq tassaarsuaqarneranik eqqugaasinnaapput.
Ajornerpaamik pisoqassagaluaruni Niaqornak tamarmi qarsunneqassaaq. Assi © : KNR
maajip 11-at 2021 17:41
Nutserisoq Connie Fontain

Angalasut Naalakkersuisut siulittaasuannit, Múte B. Egedemit IA-meersumit siulersorneqartut sapaatip akunnerani matumani nunatta avannaanukarput.

Tamaani paasissutissat ernumanartut Niaqornani, Qaarsunni, Uummannami, Saattuni, Ukkusissani Ikerasannilu innuttaasunut apuutissavaat.

Karrat Kangerluannimi nuna aalaqqajuttoq annertooq imaanut ataatsikkut sisooruni, nunaqarfinnut arlalinnut illoqarfimmullu malissuartitsisinnaavoq. Ingammik Qaarsut aamma Niaqornat navianartumiipput.

Inuit maliit qummut angusinnaasaannit appasinnerusumi najugaqartut najukkaminniiginnarnissartik imaluunniit pisortanit ikiorneqarlutik allamut nuunnissaq qinersinnaavaat.

Malinnit anguneqarsinnaasutut taaneqartut tassaapput tassaarneranit maliup timmut angusinnaasaa qutsinnerpaaq. Tassa sumiiffiit maliit angusinnaasaat.

 

Assi © : Google Maps

 

Innuttaasut 176-it najugaat tassaarsuarmit eqqugaaratarsinnaapput, aammali nunaqarfinni qassiusuni nukissiorfiit aarlerinartumiipput. Uummannami peqqissaavik aamma aarlerinartumi inissisimavoq.

Danmarkimi Kalaallit Nunaannilu nunap qanoq issusianik misissuiffimmit, GEUS-imit, aamma norskit nunap pissusianik ilisimatusarfiannit ujarassiuut pissutsit misissorpaat.

Taakkulu Karrat Kangerluanni sumiiffiit pingasut aarlerinartutut aalajangerpaat. Qaqqamiilli annertuumik qaqugu sisoortoqassanersoq qaquguluunniit taama pisoqarsinnaanersoq siulittoruminaappoq.

Ajornerpaamik pisoqarnerani sumiiffik 3-mik nalunaaqutsersimasoq ataatsikkut sisuussaaq.

Sumiiffiit 1, 2 aamma 3 aarlerinartutut nalunaaqutsersimasut assimi takusinnaavatit, taakku normu 1, 2, 3-millu nalunaarsorsimapput:

 

Assi © : Naalakkersuisut

Paasissutissarsiffik: GEUS, Naalakkersuisut

 

Maliit qummut angusinnaasaannit appasinnerusumi najugaqartut nakjukkaminni najugaqaannarsinnaapput imaluunniit nuunnissaminnut ikiorneqarsinnaallutik.

GEUS-ip nunamut assilialiai Naalakkersuisut tamanut saqqummiuteqqammerluinnagaat uani takusinnaavatit:

Nuugaatsiaq:

Qaqqami sumiiffik aarlerinartoq, tassa Karrat 3-mik nalunaaqutsigaq, imaanut ataatsikkut sisooraluarpat maliit 32-mit 74 meterimut portussuseqassapput. Tassaarneranilu maliit nunamut 500 meterimik tiffartigisinnaallutik.

 

Illorsuit:

Illorsuarni – ujarassiuut naatsorsuinerat naapertorlugu – Karrat 3-mik nalunaaqutsigaq tamarmi sisooraluarpat maliit 19-init 43-t meterinut portussuseqassapput, tamannalu illuliorfiusimasumut tamarmut qarsutsissalluni.

 

Qaarsut: 

Karrat 3-mik nalunaaqutsigaq ataatsikkut imaanut sisooraluarpat nunaqarfiup ilarujussua qarsunneqaratarsinnaavoq. Ujarassiuullu maliit 9-mit 23 meterisut portussuseqassangatippaat, tassaarneranilu maliit nunaqarfiup kujataata tungaatigut 300 meterit missaannik tiffartigissangatinneqarlutik.

 

Niaqornat:

Karrat 3-mik nalunaaqutsigaq ataatsikkut sisuussagaluarpat Niaqornani maliit 9-mit 17 meterinut tiffartigissapput. Taamaattoqassappallu nunaqarfik tamarmi qarsunneqassalluni.

 

Uummannaq:

Uummannami umiarsualivimmit avannaanut tamarmi najugaqarfigineqanngitsup ilaa portusuunik maleqaratarsinnaavoq. Maliit 6-mit 14 meterinut portussuseqartussatut nalilerneqarput, tassaarneralu nunamut 100 meterinik tiffartiisinnaallutik .

 

Saattut:

Saattuni maliit qaarnerminni 10,5 meterinik portitigalutik qarsutsinerat killeqassasoq, ujarassiuut nalilerpaat, taakkulu nunamut ikerlaap eqqaani umiarsualivimmi arlalinnik illorsuaqarfiusumut 100 meterit tikillugit tiffasitsigisumut killissinnaapput.

 

Ukkusissat:

Ukkusissani maliit qummut 5-imit 7,5 meterinut portussuseqassangatinneqarput. Ingammillu ikerlammi tassaarnera 50-init timmut 75 meteriusinnaapput.

 

Ikerasak:

Karrat 3-mik nalunaaqutsigaq tamarmi ataatsikkut imaanut sisuussagaluarpat tamanna Ikerasammi umiarsualiviup eqqanut, arlalinnik illorsuaqarfiusumut maliit 11 meterinik qummut anngutissapput.