Siumut Hardenbergilu IA-mit sakkortuumik isornartorsiorneqartut
Naalakkersuisut siulittaasuata naalakkersuisoqarfiani pisortaanerup Svend Hardenbergip, tusagassiorfiit naapertorlugit, Siumup Folketingimut ilaasortarisimaanut Nick Nielsenimut allagaqarluni Greenland Contractorsip Pituffimmi kiffartuussinissamik isumaqatigiissummik annaasaqarneranut atatillugu Naalakkersuisut iliuuseqarsimannginnerannik oqaaseqarsimanerminik eqqunnginneraanissamik peqqusisimanera, Inuit Ataqatigiit sinnerlugit Inatsisartuni ilaasortap Aqqaluaq B. Egedep assuarnartutut akuerineqarsinnaanngilluinnartutullu nalilerpaa.
AAMMA ATUARUK Nick Nielsenip tunuartitaanini paasisinnaanngilaa
Aqqaluaq B. Egede naapertorlugu Svend Hardenbergip taamatut suliakkerneqarnini itigartissimasariaqaraluarpaa, atorfilittatullu ilumoortutut Naalakkersuisut qanoq iliornissaannik siunnersorlugit.
Pissaanerup pingasoqiusatut agguataarsimaneranut naapertuutinngilaq
- Naalakkersuisut Siulittaasuata ilisimasariaqarpaa qinikkat, Inatsisartuniippata, kommunalbestyrelsiniippata imaluunniit Folketingimiippata, Naalakkersuisunit ilumuunnginneraallutik oqaaseqarnissaannik piumaffigineqarsinnaanngimmata. Tamanna pissaanerup pingasoqiusatut agguataarsimaneranut naapertuutinngilaq, neriuppugullu tamanna Naalakkersuisut Siulittaasuata ilisimagaa, Aqqaluaq B. Egede taama allappoq, ilanngullugulu oqaatigalugu Svend Hardenbergip tatiginassusia qinersineqanngikkallarmalli innarlerneqarpoq, pisorlu manna tunngavigalugu tassuunatigut allannguuteqartoqanngitsoq.
AAMMA ATUARUK Nickip Naalakkersuisunik tikkuartuisimanini soraarsitaassutigigaa
Aqqaluaq B. Egedep partiit allat kajumissaarpai taamatut suleriaaseqartoqarneranik akuersinnginnerminnik nalunaaruteqaqqullugit.
- Pingaartumillu partiit naalakkersuisooqataasut akuersinnginnermik nalunaaruteqarnissaat pingaaruteqarpoq. Taamaanngippammi Namminersorlutik Oqartussat qaffasinnerpaamik atorfilittaata partiit oqaaseqartitaasa oqaasissaanik aalajangiisuussanersoq nalorninarsissaaq, taama erseqqissaavoq.
AAMMA ATUARUK Siumup naalakkersuinikkut ingerlatsinera Olsvigip isornartorsioraa
