VIDEO Siumup naalakkersuinikkut ingerlatsinera Olsvigip isornartorsioraa
- Naalakkersuinikkut taamatut ingerlatsisoqassappat assut ernumanarpoq, KNR-imut taama oqarpoq.
Peqqissutsimut naalakkersuisup Doris Jakobsenip Folketingimut qinersisoqarnissaata tungaanut Folketingimut uterteqqinnissaanik aalajangertoqarnerata kingorna taama oqarpoq. Sinniisua Nick Nielsen soraarsitaavoq.
- Partiimit nalunaarutigineqarpoq partiip taassuma (Siumut, aaqq.) nammineq iluminni akornutigisimasatik, tassalu ataqatigiissaarinngitsoorsimanertik peqqutigalugu naalakkersuisoqarfik annertoorujussuaq aningaassanut inatsisitsinni annerpaamik aningaasalerneqartartoq milorujunneqaannarpoq allamut allanik suliassaqareersumut, Sara Olsvig taama oqarpoq.
Aamma atuaruk Nickip Naalakkersuisunik tikkuartuisimanini soraarsitaassutigigaa
Peqqissutsimut naalakkersuisoqarfimmut akisussaaffik Martha Lund Olsenimut, ilaqutariinnermut, naligiissitaanermut isumaginninnermullu naalakkersuisooreersumut tunniunneqarpoq.
Taamaammat Inuit Ataqatigiit isumaqarput Siumup Nick Nielsen Folketingimi sulitiinnartariaqaraluaraa.
- Qaammatit marluk matuma siorna aalajangersimasinnaagaluarput Folketingimut ilaasortaatitartik ilaasortaatiinnassallugu, Sara Olsvig isumaqarpoq, aammaattaaq isumaqarpoq Nick Nielsenip taarserneqarneratigut Siumut qinersisartut qinersisimanerannut maniguutinngitsoq.
Aamma atuaruk Doris Jakobsen Folketingimut uteqqippoq
- Uanga upperilluinnarpara innuttaasut Folketingimut qinersimmata inuit qinerusutatik qinersimassagaat - aamma sinniisussatut, Sara Olsvig oqarpoq.
Doris Jakobsen siorna qinersisoqarmat peqqissutsimut naalakkersuisunngornerata kingorna Folketingimi ilaasortaaffia inuttaaruppoq. Sinniisussaa siulleq Vittus Qujaukitsoq Naalakkersuisunut aamma ilaasortanngorpoq, taamaammat sinniisussat aappaat Nick Nielsen Folketingimut ilaasortanngorluni.
