Siumut Folketingemi: nammineernerulernissamik kissaateqarput
CHRISTIANSBORG: Siumuup Folketingemut ilaasortaatitaa, Doris Jakobsen, ammaanersiornermi oqalugiaammini Socialdemokraternekkunnik suleqatiginnilluarsimanermik qujallunilu, aningaasartuutissanut inatsimmut kissaateqarlunilu Kalaallit Nunaatalu namminersornerata annertusarnissaanik kissaateqarluni oqaaseqarpoq.
Doris Jakobsenip aallarniutigalugu statsministerip nunatsinni savalimmiunilu suliffeqarfiit Vækstfondenimut atorsinnaanissaannik siunnersuutaa qujassuteqarfigaa.
Siunnersuut Thorningip Folketingep ammaanersiornerani oqalugiaammini marlunngormat eqqaavaa, Siumullu neriuppoq Kalaallit Nunaanni inuussutissarsiorfiit aningaasaliisullu aningaasaqarnerannut iluaqutaassasoq.
Eqqartuussisoqarneq aningaasaliiffigineqarnerussasoq
Danskit 2015-imi aningaasartuutissanut inatsisaannut isumaqatigiinninniarnermi Siumut IA-lu ukioq manna suleqatigiinniarlutik aalajangersimapput, kissaatigineqartullu ilagaat nunatsinni anstaltsbetjentit akissarsiaqarnerulernissaat nunatsinnilu isertitsiviit anstaltillu pitsanngorsarnissaat. Tamakkumi Intsisit atortinneqarnerannut tunngasut suli Danmarkip akisussaaffigai.
Tamakku saniatigut Doris Jakobsenip eqqaavaa danskit illersornissamut ministereqarfiannit isumaliutissiissut decembarimi saqqummertussaq, Kalaallit Nunaannilu namminneq piumassutsiminnik aallaaveqartumik isumannaallisaanermik pilersitsisoqarsinnaaneranik ilaqartussaq Siumumit qilanaarigitsik.
Tassungalu ilanngullugu Kalaallit Nunaat qulaallugu timmisartortoqartanera qanoq annertutiginersoq, qanorlu naleqarnersoq annertuumik misissorneqarnissaa kissaatigaa.
Kalaallit Nunaat Free Associationimi
Danskit naalakkersuisuinik suleqateqarneq pitsaagaluartoq Doris Jakobsenip erseqqissarpaa Siumut siunnersuuteqartoq "Free Association"-imut aaqqissuussinermut, Naalagaaffiit Peqatigiinnit akuerisamut, Kalaallit Nunaat ilaasariaqartoq.
Tamassuma Kalaallit Nunaata nunat tamalaat akornanni politikikkut ataatsimeersuarnerni nammineerluni peqataasarsinnaanngortissavaa, illersornissamut nunanullu allanut tunngasunut Danmarkimut suleqatiginninneq allanngortinngikkaluarlugu.
- Danskit partiivi suleqatigalugit piffissami aggersumi aaqqissuussineq tamanna misissorluassagipput, Siumumit kajumissaarutigaarput, Doris Jakobsen oqaluttarfimmit oqarpoq.
Aamma atuaruk Doris Jakobsenip Folketingimi ataatsimiinnerup ammarneqarnerani oqalugiaataa
