Siumup ataatsimeersuarnera ullumi aallartittoq ima pilersaaruteqarfiuvoq

Partiip ilaasortai siuuuttussaminnik sapaatiuppat taasissapput. Qinersineq naalakkersuisut ataannarnissannut pingaaaruteqarsinnaavoq.

Allattoq Mathilde Justesen Ranners

juulip 28-at 2023 07:55

Nutserisoq Per Rosing

Siumumi piffisami tulliuttumi siulittaasujumaartoq sapaatiuppat ualikkut aalajangerneqalerpat pissanngannersuaqassaaq.

Siulittaasumut qinersineq Siumup nalinginnaasumik ataatsimeersuarnerani ukioq manna Qasigiannguani ingerlanneqartumi ulllumilu aallartittumi aalajangerneqassaaq.

Sapaatiuppat taasinermi partiip ilaasortaasa aalajangissavaat folketingimut ilaasortaq Aki-Matilda Høegh-Dam, massakkut siulittaasuusoq Erik Jensen imaluunniit siulitaasuusimasoq Kim Kielsen siuttorissanerlugu.

SIUMUP ATAATSIMEERSUARNERANI IMA PISOQASSAAQ

Tallimanngorneq

10:30 - 15:00 – Siulittaasup saqqummmiinera
15.00 - 15:30 – Naatsorsuutit saqqummiunneqarnerat

Arfininngorneq

09:00 - 17:00 – Politikkikkut anguniakkat pillugit eqimattakkuutaarluni sulinerit, taassuma ataani makku:
- Isumalluutit
- Peqqissuseq ilinniagaqarnerlu
- Ineqarfiit oqartussallu ingerlatsivii
- Aalisarneq
- Namminersorluni Oqartussat pillugit inatsit aamma ingerlaqqinnissaq

Sapaat

10:00 - 11:00 – Naalagiarneq
14:00 - 17:00 – Siumup siulittaasussaanik aamma siulersuisuunerit sinnerinik qinersineq

Allisiguk

Taasisoqartinnaguli siulittaasumik qinersisinnaasut qassiuneri ullumi aalajangerneqassaaq.

Taasisinnaasut tassaapput Siumup Inatsisartunut aamma naalakkersuisunut ilaasortaatitai, sumiiffinni siulittaasut, Folketingimut ilaasortat, borgmesterit, siulersuisuunerni ilaasortat aamma partiip inuusuttunut immikkoortortaaneersut.

Aamma atuaruk- Siumumi akerleriittoqarsinnaanera Inatsisartunut qinersinissamik kinguneqarsinnaavoq

Sapaatip akunnerata naanerata ingerlanerani partiip politikkikkut anguniakkatik arlallit oqallisigissavaat, ilaatigut aalisarneq, namminersorneq pillugu inatsit, ineqarneq aamma peqqissuseq. Taakku saniatigut partiip immikkoortortaasa siunnersuutaat aamma eqqartorneqassapput.

Siumut partiitut 1977-imi pilersinneqarpoq, ukiorpassuarnilu naalakkersuisunut siuttuusarluni.

Siulittaasoq nutaaq qinersinermik kinguneqarsinnaavoq

Ataatsimeersuarneq sioqqullugu KNR-ip politikkikkut oqaaseqartartoq Sten Lund aamma naalakkersuisuni siulittaasuusimasoq Lars-Emil Johansen oqaloqatigai kina partiimi siulittaasunngussanersoq apeqqutaatillugu politikkikkut pissutsit qanoq inissittoqarnissaa pillugu.

Tassunga tamarmik akipput Kim Kielsenip amma Aki-Matilda Høegh-Damip naalakkersuisut aamma IA-mik naalakkersuisooqatigiinneq unammillernartoqalersissagaat. Allatut oqaatigalugu: Inatsisartunut qinersinermik kinguneqarsinnaavoq.

Ukiut marluk sinnilaaginnarlugit qaangiupput kingullermik Inatsisartunut qinersisoqarmat.

Akerlianik Erik Jensen Siumumut siulittaasutut qinigaaqqippat naalakkersuisooqatigiit ajornartorsiuteqanngitsumik ingerlaqqissinnaasut, marluullutik naliliipput.

Sten Lundip aamma Lars-Emil Johansenip kina siulittaasunngorniunnermi ajugaassanersoq eqqoriarsinnaanngilaat. Kisianni isumaqatigiipput ilimanarluinnartumik amerlaqatigiingajannik taaneqassasut.

Tamarmik immikkut pikkoriffeqarput sanngiiffeqarlutillu

Sapaatip akunnerata naanerani siulittaasunngorniunnermut piareersarnertut KNR-ip Sten Lund qinnuigaa qinigassanngortittut taakku pingasut pikkoriffii sanngiiffilu nalileqqullugit.

TAAMAATTUMIK SIUMUP ATAATSIMEERSUARNERA KNR-IMIT MALINNAAFFIGINEQARPOQ

KNR-ip tusagassiortut pingasut Qasigiannguani Siumup ataatsimeersuarneranut aallartippai.

Partii Inatsisartuni partiit annersaasa tullerimmagu aamma Inuit Ataqatigiit naalakkersuisooqatigimmagit KNR taamaliorpoq.

1979-imiilli partii naalakkersuisuni qitiuvoq. Partii atasuinnangajammik siulittaasuutitaqarsimavoq – taamaallat marloriarluni Inuit Ataqatigiit siulittaasuusarput. Siullermik 2009-2013-imi.
Aappassaanik massakkuuvoq marsi 2021-mi qinersisoqarnerata kingornatigut Múte B. Egede siulittaasunngormat.

Siumumi siulittaasumik qinersineq Kalaallit Nunaanni politikkikkut pissutsinut annertuumik sunniuteqassaaq.

Tassani naliliiivoq Erik Jensen siulittaasutut partiimi eqqissisitsisimasoq, kisianni inunnut amerlanernut anngussiuminaatitsilluni.

Akerlianik isumaqarpoq Kim Kielsen aggerfimmut misigissutsit pillugit oqallorissuusoq. Kim Kielsenip sanngiiffii pillugit Sten Lund isumaqarpoq oqaaseqartarnermigut kipparissinnaasoq, tamannalu siusinnerusukkut partiimi ajornartorsiornermik kinguneqartartoq.

Aamma atuaruk Politikeritoqaq oqaaseqartartorlu: Siumumi sassartut pikkoriffii sanngiiffiilu aajuku

Aki-Matilda Høegh-Damip nukittuffiginerusaatut Sten Lundip naliliinera naapertorlugu tassaavoq internetikkut saqqummiillaqqissusaa, internetimi atuisut angulluarsinnaasarlugit. Folketingimi issianini sanngiiffigaa taamalu qinersisartunut ungasinnerulluni.

Siulittaasumut qinersineq siulliunngilaq

Siumumi ataatsimeersuarneq kingulleq 2020-mi Nuummi ingerlanneqarpoq.

Aamma taamani siulittaasumut qinigassat pingasuupput taasinermilu sassartut amerlaqatigiingajannik taaneqarlutik, Erik Jensen Kim Kielsenimit arfineq marlunnik amerlanernik taaneqarpoq taamalu partiimut siulitaasunngorluni.

Siumut siulersuisuunernik qinersilerpat siulittaasumik qinersineq sapaatiuppat nalunaaqutaq marlunut oqaluuserisassani siullerpaavoq.

Nutaarsiassami kukkunermik nassaarsimaguit uunga allaffigineqarsinnaavugut.