Siumukkormiut Nuna tamakkerlugu sapaatiuppat partiiminni siulittaasussamik taasilerpata kina qinissanerlugu isumaliuutigileeruttorpaat.

Partiimi siulittaasussatut sassartut pingasuupput: Maannakkut siulittaasoq Erik Jensen, siornatigut siulittaasuusimasoq Kim Kielsen aamma ullumikkut Folketingimi ilaasortaasoq Aki-Matilda Høegh-Dam.

Kina siulittaasunngussanersoq aallaavigalugu apeqqut tassaalissaaq Siumut naalakkersuisooqataaginnassanersoq imaluunniit Siumut naalakkersuisooqataanani politikkikkut ilisarnaataata siulittaasunngortussap nukittorsassaneraa.

Lars-Emil Johansen, 1987-imiit 1997-imut Siumumi siulittaasuusimasoq, taama oqarpoq.

Lars-Emil Johansen naapertorlugu siulittaasussatut sassartut pisinnaasaatigut marlutsigut nalilersorneqassapput - suleqatigiissinnaanerisigut partiillu politikkianik ingerlassaqarsinnaanerisigut.

- Siumut siulittaasunut piumasaqaatissaq pingaartorujussuaq, immaqaluunniit pingaarnerpaasoq tassaavoq suleqatissarsiullaqqissuseq tassami taanna aqqutigalugu siumup politikkianik piviusunngortitsiniarneq ingerlasussaammat, taanna oqarpoq.

Lars-Emil Johansenip sassartut nukittuffii sanngiiffiilu nalilersorpai

- Suleqatigiissinnaassuseq taanna qularnanngittumik maannakkut siulittaasuusup Erik Jensenip ersarinnerpaamik taakkunani pingasuni takutissimavaa. Maannakkut naalakkersuisooqatigiinnermi Inuit Ataqatigiillu oqarsinnaagunarpugut patajaatsumik naalakkersuisunik inissisimanermikkut. Kisiannili maannakkut siulittaasuusup sanngiiffigisaatut oqaatigineqarsinnaavoq Siumup politikkianik ersarissumik ingerlakatsisinnaaneq.

-  Siulittaasunngorniartut allat marluk Kimikkut Akillu taama ersaritsigisumik misilittagaqarfiginngilaat, immaqalu allaat ajornerusumik misilittagaqarfigalugu, Aki suleqateqarnissamut maannamut ersarissumik misilittagaqanngilaq.

Tamanna tunngavigalugu Lars-Emil Johansen isumaqarpoq Erik Jensen qinigaaqqissaguni maanna Inuit Ataqatigiit Siumullu naalakkersuisooqatigiinnerannut iluaqutaassasoq.

Naalakkersuisooqatigiinni Siumup Naleraq taarsermagu Erik Jensenip nuannaarutigaa. Erik Jensenilli maanna siulittaasunngoqqissanngikkaluarpat Siumut naalakkersuisooqatigiiginnarnissaa Lars-Emil Johansenip Sten Lundillu qularutigaat. Assi © : KNR

Sten Lundip sassartut nukittuffii sanngiiffiilu nalilersorpai

Siulittaasussatut sassartut nukittuffii sanngiiffiilu nalilersoqqullugit politikkikkut oqaaseqartartoq, Sten Lund, KNR-ip aamma qinnuivigisimavaa.

Erik Jensenip suleqateqarluarsinnaanini takutissimagaa, partiilli politikkianik ersersitsisimavallaannginnera pillugit Lars-Emil Johansenip oqaatigisaa Sten Lundip taperserpaa.

- Erip nukittoqqutigigunarpaa partii Siumut eqqissitissinnaanerusimangamiuk siornatigorniit, aammalu maannakkut naalakkersuisooqatigiimmat taamaalilluni suleqatigiissinnaassuseq taanna nukittuffigalugu ersersissimavaa. Kisianni sanngiiffinginerusaanut oqartoqarsinnaavoq ungalliunerusuni politikkikkut eqquffigineqartariaqarnerusut taakkua angorpiarsinnaasimannginnamigit.

- Akip nukittuffiginerusaatut isikkoqarpoq internetikkut saqqummiillaqqissussi internetimi atuisut taakkua angulluarsinnaasarlugit. Aappaatigut sanngiiffigisinnaasorivara misilittagakissutsi aammalu nunatsinni sulisimannginnerminik amigaateqarnera.

- Kimip nukittuffigisimavaa siumumi ilisarnaataasartoq piffimmi assigiinngittuni pingaartitsineq nuna tamakkerlugu isigalugu, uanili sanngiiffigisinnaasaani ilaavoq ilaannikkut oqariartuutai killeqalaartarsimasinnaapput taamaalilluni tamakkiisumik paasineqarnissaa avammut pinngitsoortarsimallungu. Taassumap kingunerisinnaasimavaa siumut iluani akerlereeqqajaaneq taanna pilertarsimammat.

Aki-Matilda Høegh-Dam sassartuni pingasuusuni kisiartaalluni siulittaasutut misilittagaqanngilaq. 2019-imili Folketingimi ilaasortaavoq politikkikkullu sunneeqataangaatsiarsimalluni. Assi © : Ólafur Steinar Rye Gestsson/Ritzau Scanpix