Nutserisitsineq unioqqutitsinngilaq: Siumulli isigineqarneranut innarliivoq
Siumumi poitikeri Markus E. Olsen Folketingip ammaanersiorneqarnerani Aki Mathilda Høegh-Damimut taartaavoq.
Tassani malugniarneqarlualaavippoq.
Kingornami paasinarsivoq Markus E. Olsenip qatanngutini nutserisutut sulisissimagaa.
Pingasunngornermilu qatanngutaanit tamanna uppernersarneqarpoq:
- Aap, taamaaliorpunga, Lars K.S. Olsen KNR-imut nassuerpoq.
Folketingimili qatanngutigisamik nutserisitsisoqarsinnaava?
Eqqartuussissuserisoq naalagaaffiillu inatsiaat pillugit professori aperigaanni akissutaa ersarippoq:
- Makkorsip qatanngutiminik nutserisutut (taamaassimappat) sulisitsisimanera inatsisinik unioqqutitsinngitsoq isumaqarpugut, Britta Keldsen KNR-imut allakkatigut akissuteqarluni allappoq.
Soorlu inerteqqutaannginneranut pissutaasoq pisariunngilaq:
- Suliassaqarfimmi inatsiseqanngimmat, Sten Bønsing, Aalborg Universitetimi naalagaaffiit inatsiaat pillugit professori, oqarpoq.
Siumut pasinarsagaasoq
Siumut siulittaasuanut unioqqutitsisoqarsimannginnera iluarineqarpoq, kisiannertaqarlunili:
- Taamannak naliliisoqarpat nuannaarutigaara, kisianni pasinarsarneqarnissaq isornartorsiorneqarnissarlu pinngitsoortinnissaat pingaaruteqarpoq. Partiitta iperterutaasinnaasumik arlaatigut tikkuartuutaasinnaasumik pinngitsuuinissaq pingaartikkatsigu, Erik Jensen oqarpoq.
Siulittaasoq taamaammat aamma suliassaqalerpoq:
- Partiip naleqartitai isumaalu ilaasortatsinnut tunuliaqutatsinnullu paasinarsaqqissaarnissaat pisariaqarpoq.
Najoqqutassiat qanorpiaq ersarissarneqassanersut apeqqutaavoq suli akineqanngitsoq, aamma suliaq Markus E. Olsenimut kinguneqartinneqassanersoq.
- Makkorsilu ingilluta eqqartuilerutta akunnitsinni sammiumaarparput. Tusagassiorfiit aqqutigalugit tamakku sammissanngilakka, Erik Jensen oqarpoq.
Siullerpaamik naggammillu
Pisoq unioqqutitsinerunngikkaluartoq taamannak pisoqaqqinnginnissaa pillugu aaqqiissutissarsisoqassaaq.
Suliassarli taamaallaat Siumut suliassarinngilaa.
- Tamatta akisussaaffeqarpugut, taamaammat ataatsimoorluta aaqqiissutissarsissaagut. Tikkuartuinissaq inerisaataavallaarnavianngilaq, Erik Jensen oqarpoq.
Folketingip siulittaasua Søren Gade (V) Ekstra Blademut oqarpoq 'aatsaat siullerpaamik’ Folketingi qinikkanut ilaqutaasunik sulisitsisoq.
Nutserisoqarnermik aaqqiissummut malittarisassat Folketingimit allanneqalerpata qulakkeerneqassaaq.
- Neriorsuutigissavara malittarisassat allanneqalerpata ilaquttanik atorfinitsitsisoqarsinnaannginnissaa siunnersuutigissagakku, Søren Gade Ekstra Blademut oqarpoq.
Suliassaq massakkut tassa Folketingimiippasippoq, malittarisassalli qaqugu qanorlu imaqassanersut suli ilisimaneqanngilaq.
