Tusagassiorfik: Markus E. Olsen-ip Folketingi ilisimateqqaarnagu qatanngunni sulisorivaa
Markus E. Olsen Siumut sinnerlugu folketingimi sinniisussatut sulinermini oqalugiaatimi nutserneqarnissaanut qatanngutini sulisussarsiarisimavaa.
Tamannalu pisimavoq Folketingip siulittaasoqarfia ilisimateqqaarnagu.
Aviisi Ekstra Bladet taama allaaserisaqarpoq.
Markus E. Olsen Folketingimut ilaasortamut Aki-Matilda Høegh-Damimut sinniisussatut sapaatit akunnerini marlunni folketingimi sulivoq.
Folketingimi sulinermini ammaanersiorluni oqallinnermi oqalugiaatimi kalaallisut saqqummiunneqarnisaanut piareersarnera pingaarutilittut qitiutinneqarpoq.
Aviisillu Ekstra Bladetip allaaserisaa naapertorlugu Markus E. Olseni suliassamut tassunga qatanngutini nutserisutut sulisussarsiarivaa.
Tamannalu Markus E. Olsenip Folketiniep siulittaasuanut Søren Gade-mut nalunaarutigisimanngikkaa, Søren Gade aviisimut Ekstra Bladet-imut oqarpoq.
Nutserisutut sulineq, Danmarkimilu akunnittarfimmiinnermi aningaasartuutit, aamma Markus E. Olsenip qatanngutaata Kalaallit Nunaannit Danmarkiliartinneranut uterneranullu Folketingimut aningaasartuutit qanoq amerlatiginsimanersut suli ilisimaneqanngilaq.
Søren Gade aviisimut Ekstra Bladetimut oqarpoq, politikerit ilaquttaminnik suliakkiisarnerat una pisoq siulliullunilu kingulliussaaq.
Tamannalu Folketingimi nutserisarnermut aaqqissuussineq pillugu malittarisassiornissamut allassimalerneratigut qulakkeerneqassasoq oqaatigaa.
- Malittarisassat ilanngunneqartussanngorpata ilaquttat atorneqartannginnissaanut innersuussinissara neriorsuutigissavara, Søren Gade aviisimut Ekstra Bladetimut oqarpoq.
Markus E. Olsenip qatanngutini nutserisutut sulisissimanerlugu aviisimut Ekstra Bladetimut uppernarsaarusunngilaq.
Nutserisutut sulisissimasani nalunngisaralugu aviisimut oqaannarpoq.
Markus E. Olsen aamma Siumut partiip siulittaasua Erik Jensen KNR-imiit oqaaseqartinniarlugit sulissutigaarput.
Erik Jensenip nalunaarutigaa, aningaasanut inatsisissaq Inatsisartuni ulapputigigamiuk maannakkut oqaaseqarsinnaanani.