Markus E. Olsenip qatanngutaa nassuerpoq: Nutserisutut atorfinitsinneqarpoq – qatanngutigiittut Folketingimit ilisimaneqanngilaq

Markus E. Olsen Ekstra Blademi paasissutissat naapertorlugit qatanngutini nutserisutut sulitissimavaa. Tamannalu ilumoortoq qatanngutaa nammineerluni KNR-imut uppernersaavoq. Siumut ilaquttanik ikinngutinillu iluaqusersuinermut soorunami akerliusoq, Siumut siulittaasua oqarpoq.

Allattoq Anders Rytoft, Gaaba Olsen

oktobarip 19-at 2023 10:49

Nutserisoq Paornánguak Kleist

Markus E. Olsenip qatanngutini Folketingimi oqalugiaatissaminik nutserisissimavaa allaffeqarfik ilisimatinnagu? Apeqqut qinikkamit Siumumeersumit akiumaneqanngilaq.

Ekstra Bladep qaninnerpaamik akissutaasinnaasoq Markus E. Olsenimit pissarsiarisimasaa tassaavoq inuk pineqartoq ilisarisimagamiuk.

Tassanngaanniit KNR-ip politikeri nammineerluni oqaaseqartinniarsimagaluarpaa, kisianni toqqorsimagunarpoq saaffiginnissullu uterfigiumanagu.

Akerlianilli Markus E. Olsenip qatanngutaa Lars K.S. Olsen pissarsiarineqarsimavoq. Folketingip ammaanersiornerani qatanngutiminut nutserisuusimanerluni toqqaannartumik aperineqarami, akivoq:

- Unneqqarissumik. 117-it allat assigalugit nalunngilat Folketingimi siulittaasoqarfik kisimi atorfinitsitsisinnaavoq. Taakkuuku ajornartorsiuteqartut, Lars K.S. Olsen oqarpoq.

Markus E. Olsenimut nutserisimagavit taava uppernarsarpat?

- Aap, taamaaliorpunga.

Akissarsissutigaajuk?

- Naamik, akissarsinngilanga. Eqqaasitsissummik sinnerlunga nassitsivigisinnaavatit (Folketingi, aaqq.), oqarpoq illarlunilu.

Partip isummerfigineqarnera

Ullup ilaani KNR-ip Siumut siulittaasua Erik Jensen Inatsisartuni naapippaa.

SULIAQ NAATSUMIK

Markus E. Olsen Ekstra Blademi paasissutissat naapertorlugit Folketingip ammaanersiornissaanut atugassamik pisariaqartitsigami qatanngutini sulitissimavaa.
Markus E. Olsenilli tamanna Folketingip siulittaasuanut, Søren Gademut (V), ilisimatitsissutigisimanngikkaa Gade Ekstra Blademut oqarpoq.
Nutaarsiassaqartitsivimmut Markus E. Olsenip uppernarsarumanagulu eqqunnginnerarumanngilaa nutserisoq qatanngutiginerlugu. Ilisimatitsissutigiinnarpaa inuttaa ilisarisimasaralugu.
Qatanngutaa Lars K.S. Olsen KNR-imut maanna oqarpoq nutersisuulluni.
KNR-imit maanna misissorneqarpoq Folketingimi inatsisinik atuuttunik tamanna unioqqutitsinerunersoq.
Erik Jensen Siumut siulittaasua ilisimatitsivoq, partii ilaquttanik iluaqusersuinermut akerliusoq.

Allisiguk

Tassani Erik Jensenip Markus E. Olsen qatanngutiminik nutserisutut sulisitsisimanersoq uppernersarsinnaanagulu akerlilersinnaanngilaa.

- Inuttaa suli oqaluutinngilara. Messenger atorlugu taamaallaat attaveqatigiippugut, Erik Jensen oqarpoq ilanngullugulu oqaatigalugu Markus E. Olsen Nuummut uterpat ataatsimeeqatiginissaanik isumaqatigiissuteqarfigalugu.

Aamma atuaruk Tusagassiorfik: Markus E. Olsen-ip Folketingi ilisimateqqaarnagu qatanngunni sulisorivaa

Ilumoorsimappalli ajuusaarnartoq Erik Jensenip erseqqissaatigaa.

- Oqaaseqarnerusinnaanngilanga. Taamaallaat partiimi soorunami najoqqutassiaqartugut: Ilaquttanik iluaqusersuineq isumaqatiginngilarput, attuumassuteqannginnissamullu malitassatsinnik malittarisassaqarluta. Partiimmi isigineqarneranut isummerfigineqarneranullu kalluaavoq.

- Soorunami eqqaamaneqassapput assigiinngitsunik aalajangiinissani, oqarpoq.

Erik Jensenilli inuttaa oqaloqatigitinnagu oqaatigiumanngilaa tamanna Markus E. Olsenimut sunniuteqassanersoq.

- Ajornartorsiutiginngilara

Markus E. Olsenip qatanngutiminik Folketingip akiligassaanik sulititsisimagaluartoq tamanna nammineq ajornartorsiutiginagu Lars K.S. Olsen isumaqarpoq.

- Folketingimi siulittaasoqarfik ajornartorsiuteqarpoq.

Kisianni Markus E. Olsenimut qatanngutaanerit pillugu ilisimatinneqarsimanngillat?

- Tusariassagit suliassaq tuaviortoq matumani pineqarpoq. Ataavartumik aaqqiissutitut isigaarsi. Uanga tamanna ajornartorsiutiginngilara. Nutserisoqarnikkut ajornartorsiuteqartoqarpoq.

Isumaqarpit Markus E. Olsen illiunngitsumik allamik nutserisussarsisimasinnaagaluartoq?

- Nutserisorpassuaqarpoq. Kisianni eqqarsaatigissavat suliatigut piginnaasaqarneq pineqarmat. 1. klassemi atuartunut nutserisoqartussaanngilaq.

Isumaqarputit taava ilittut suliamik naammassinnittoqarsinnaanngitsoq?

- Nutserisoqarpassuaqarpoq. Tamanna qularutissaanngilaq, kisianni pitsaassutsimik piumasaqaatinik naammassinnissinnaasut amerlanngillat, Lars K.S. Olsen oqarpoq.

Nutaarsiassami kukkunermik nassaarsimaguit uunga allaffigineqarsinnaavugut.