Siullermik allakkatigut mianersoqqussuteqarfigineqarpoq. Maanna naalakkersuisoqarfimmi pisortaagallartoq

Naak Emanuel Rosing Aalisarnermut Piniarnermut Naalakkersuisoqarfimmi immikkoortortami sulinermini arlaleriarluni – nalunaaruteqarani sulinngitsoortarsimagaluarluni naalakkersuisoqarfimmi pisortaagallartussanngortinneqarluni atorfimmi qaffatsinneqarpoq.

Allattoq Anders Rytoft

decembarip 18-at 2023 15:03

Nutserisoq Connie Fontain

"Isornarluinnarpoq" aamma "akuersaarneqarsinnaanngilluinnarpoq".

Emanuel Rosingip pissusilersuutaanik nassuiaanermi oqaatsit atorneqartut taama ilaqarput. Tamannalu allakkatigut mianersoqqussuteqarfigineqarneranik kinguneqarpoq. Aalisarnermut Piniarnermullu Naalakkersuisoqarfimmit allagaatit KNR-ip misissorsimasai taama takussutissiipput.

Allakkani Emanuel Rosing naalakkersuisoqarfiup immikkoortortaqarfiani pisortatut 2018-imili atorfeqarnermini nalunaaruteqaqqaarnani arlaleriarluni sulinngitsoortarsimasoq allassimavoq, tamannalu akuerineqaqqaarani peqanngitsutut erseqqinnerusumik oqaatigineqarsinnaavoq.

Emanuel Rosing ukiup affaata ingerlanerani nalunaaruteqaqqaarani ulluni 20-ni sulisimanngilaq.

Taassuma aqutsisuni qaninneq imaluunniit sulisoqarnermut immikkoortortaqarfik attavigisimanngilaa. Napparsimagaanni kingusinnerpaamik qulingiluanut pisortamut qaninnermut nalunaaruteqartoqartassasoq napparsimanermut politikkimi allassimagaluarpoq.

Naalakkersuisoqarfimmi pisortaasimasoq Jørgen Isak Olsen Emanuel Rosingip pisortaani qaninnerpaagaluarpoq.

EMANUEL ROSINGIP AKUERINEQARANI SULINNGINNERI

Ullut uku pineqarput:

2022-mi aggustip 15-ianit 17-ianut
2022-mi aggustip 22-at
2022-mi aggustip 29-anit - 31-anut
2022-mi oktobarip 10-anit - 11-anut
2022-mi oktobarip 20-anit - 21-anut
2022-mi novembarip 2-at
2022-mi novembarip 14-ianit 16-ianut
2023-mi januaarip 9-anit - 13-ianut

Allisiguk

Naak Emanuel Rosingip allagaatit naapertorlugit ullorpassuit allattorsimasut isumaqatiginnginneraraluarlugit napparsimanerminik nalunaarniarluni ullut sorliit Jørgen Isak Olsenimut sianersimanini eqqaamanngilaa.

Kisianni napparsimagaangami sianertuaannangajalluni Emanuel Rosing oqarpoq.

Taama pissusilersuuteqarneq

Oqaaseqaatilli Jørgen Isak Olsenip paasinninneranut isumaanullu allannguinngillat. Naalakkersuisoqarfimmi pisortap oqarnera naapertorlugu pissutsit isornarluinnarput tamannalu marsip arfernani pisortatigoortumik allakkatigut mianersoqqussuteqartoqarneranik kinguneqarpoq.

- Immikkoortortaqarfimmi pisortatut sulisunnut maligassiuisuusussaavutit. Tamatuma saniatigut allattoqarfimmi annertuumik akisussaaffeqarputit, pissusilersuullu taama ittoq akuersaarneqarsinnaanngilluinnarpoq. Tamanna Aalisarnermut Piniarnermullu Naalakkersuisoqarfimmit akuerineqarsinnaananilu akuerineqarusunngilaq, taama allassimavoq.

Aamma atuarukNaalakkersuisoqarfimmi pisortaq suliunnaarsitaasoq

Naveersineq tamanna Emanuel Rosingip akueriniarlugu aalajangersimavaa.

Allakkatigut mianersoqqussuteqarneq taanna pissutigalugu Emanuel Rosing taama pissusilersuuteqaqqissaguni sulisitsisuminit soraarsinneqarsinnaallunilu soraarniaqquneqarsinnaavoq. Jørgen Isak Olsenili tassani aalajangiisinnaanngilaq.

Taannami naalakkersuisoqarfimmi pisortatut septembarip arfineq-aappaani soraarsinneqarpoq.

Tamatuma kingorna Emanuel Rosing naalakkersuisoqarfimmi pisortaanerugallalerpoq.

KNR-ip Emanuel Rosing attaveqarfigaa. Taassuma suliaq oqaaseqarfigerusunngilaa. Aamma aalisarnermut naalakkersuisoq, Kim Kielsen, naalakkersuisullu naalakkersuisoqarfiani pisortaq, Hans-Peder Barlach Christensen, suliaq pillugu oqaaseqarusunngillat. Inuit ataasiakkaat pillugit oqaaseqarusunnatik taakku oqarput.