Naalakkersuisoqarfimmi pisortaq suliunnaarsitaasoq
![](/sites/default/files/styles/image_934x467/public/2023-09/Jrgen%20Isak%20Olsen%20Dep%20chef%20Fiskeri%20og%20Fangst.jpg?itok=jKWMKNth)
Aalisarnermut Piniarnermullu Naalakkersuisoqarfiup pisortaa, Jørgen Isak Olsen, suliunnaarsitaavoq.
Naalakkersuisut siulittaasuata Naalakkersuisoqarfia tusagassiorfinnut taama nalunaarpoq.
Aalisarnermut Piniarnermullu Naalakkersuisoqarfiup pisortaa, Jørgen Isak Olsen, atorfimminit atuutilertortumik suliunnaarsitaavoq. Tamanna naalakkersuisoqarfiup pisortaa aamma Namminersorlutik Oqartussat illuatungeriillutik isumaqatigiissutigaat.
Illuatungeriit taakku tamanna pillugu oqaaseqarniarnatik isumaqatigiipput.
Jørgen Isak Olsen sooq suliunnaarsitaanersoq, tusagassiorfinnut nalunaarummi ilisimatitsissutigineqanngilaq.
Aalisarnermut Piniarnermullu Naalakkersuisoqarfimmi pisortatut atorfik inuttassarsiuunneqalertussaaq.
Emanuel Rosing naalakkersuisoqarfimmi tassani atorfinitsitsisoqarnissaata tungaanut pisortaagallassaaq.
Jørgen Isak Olsen naalakkersuisoqarfimmi ukiuni qulini pisortaavoq.