Siulittaasup akissarsiaanik qaffaasoqarnera tupigusuutigineqartoq
Qaffariaataat 250.000 koruuniupput, akissarsiaatalu qaffanneqarnerat Partii Naleqqameersup Pele Brobergip tupigusuutigaa:
- Tupinnaqaaq Kalaallit Airports A/S-ip siulersuisuinut akissarsiarititaasut Royal Greenland A/S-imit annerungaatsiartut, naak ingerlatsivik minnerungaatsiartoq, Pele Broberg Naalakkersuisunut § 37 naapertorlugu apeqquteqaatimini taama allappoq.
Royal Greenlandip siulersuisuini siulittaasup akissarsiai 500.000 koruuniupput, Kalaallit Airportsillu siulersuisuini siulittaasoq taamaalilluni 250.000 koruuninik akissarsiaqarnerulluni.
Akissarsiat siulersuisut 2018-imi juunip 25-ani immikkut ittumik ataatsimeersuarneranni Namminersorlutik Oqartussat kissaateqarnerisigut qaffaavigineqarput.
AAMMA ATUARUK Kalaallit Airports forventer at begynde udbud i januar
Namminersorlutik Oqartussat suliffeqarfiutaanni siulersuisut akissarsiaannut tunngasut Naalakkersuisut siulittaasuata naalakkersuisoqarfiata ataani akisussaaffigineqarput. Naalakkersuisoqarfimmi pisortaq, Søren Hald Møller, akissarsianik qaffaaneq pillugu Sermitsiaq.AG-mut mailikkut ima allappoq:
- Akissarsianik qaffaaneq siulersuisuni siulittaasup aningaasaliisussarsiornermi sanaartornermilu annertuumik suliassaqarneranik, aktiaateqarlunilu ingerlatseqatigiiffimmi siulersuisuini siulittaasup nalinginnaasumik suliarisartagaanit annertunerusumik suliassaqarneranik pissuteqarpoq, Søren Hald Møller Sermitsiaq.AG-mut KNR-imullu mailikkut taama ilisimatitsivoq.
AAMMA ATUARUK Danmarkimut isumaqatigiissutikkut aningaasaliisussat allat ingalassimaniarneqartut
Suliassaqarneruneratali tunngavilersuutigineqarnera Pele Brobergip naammaginngilaa. Taassuma ilaatigut tikkuarpaa mittarfiliortiternissamik pilersaarut danskit naalagaaffiannit aningaasalersorneqartussatut inerneqartoq, taamaattumillu paarlattuanik Kalaallit Airportsimi siulersuisut suliassaat oqinnerulersut.
Akissarsiat qaffaavigineqarnissaat aalajangerneqarmat Pele Broberg Partii Nalerarlu Naalakkersuisooqataapput. Pele Brobergillu KNR-imut erseqqissaatigaa taama aalajangertoqarnera partiip naalakkersuisooqataanermini aamma akerlerigaa.
