Mittarfiit: Danmarkimut isumaqatigiissutikkut aningaasaliisussat allat ingalassimaniarneqartut
Aningaasalersueqataarusuttoq ataaseq arlallilluunniit - soorlu assersuutigalugu USA - Kalaallit Airports A/S-ip ataani ingerlatseqatigiiffimmik Nuummi Ilulissanilu mittarfinnik ingerlatsisussamut aningaasaliilluni piginneqataajumassappat, tamanna Naalakkersuisut illuatungaanilu danskit naalakkersuisuisa akuersinerisigut aatsaat pisinnaavoq.
Naalakkersuisut Danmarkillu aningaasaatinut ministereqarfiata danskit naalagaaffiata mittarfinnik marluusunik piginneqataanissaa pillugu maannamut isumaqatigiinniarnerini piumasaqaatissatut isumaqatigiissutigineqartuni tamanna atuarneqarsinnaavoq.
Piginneqatigiiffiit pillugit inatsisiliorneq pillugu lektori, Copenhagen Business Schoolillu (CBS) immikkoortortaqarfiani "Law"-imi pisortap tullia KNR-imut taama oqarpoq.
AAMMA ATUARUK Mittarfiit pillugit inatsisissaq sisamanngornermi taasissutigineqassaaq
Danmarkip mittarfinnut aningaasaleeqataanera:
- Danmarkip Nuummi Ilulissanilu mittarfinnut 700 millionit koruuninik aningaaliinissani piareersimaffigaa. Naalagaaffik taamaalilluni mittarfiit marluusut 33,3 procentimik piginneqataaffigissavai.
- Tamatuma saniatigut aamma Nunani avannarlerni taarsigassarsiniartarfimmit den Nordiske Investeringsbankimit 450 millionit koruuninik taarsigassarsinissaq qinnuteqaatigineqassaaq, erniallu appasitsinniarlugit naalagaaffik taarsigassarsinermut qularnaveeqqusiissaaq.
- Kiisalu naalagaaffik aningaasaliissutinik pisariaqartitat sinnerinut 450 millionit koruuninik erniakitsumik taarsigassarsisitsissaaq.
Aningaasalersuerusuttorlu ataaseq arlallilluunniit Kalaallit Airports A/S-imut aningaasaliilluni piginneqataasinnaanera nunatta Danmarkillu siunissami isumaqatigiissutigaluarunikku, tamanna piginneqatigiinnermut piumasaqaatit Danmarkip nunattalu maanna isumaqatigiissutigisassaat naapertorlugit aamma pissaaq.
- Taama pisoqassagaluarpat piginneqatigiinnermut isumaqatigiissutip allamut aamma pituttuinissaata piumasaqaatigineqarnissaa ilimanarsinnaavoq, Troels Michael Lilja KNR-imut oqarpoq.
Løkke: USA tigussaasumik neqerooruteqanngilaq
Piumasaqaatit naapertorlugit Nuummi Ilulissanilu mittarfiit allanit piginneqataaffigineqassappata nunarput Danmarkilu tamatumunnga itigartitsisinnaatitaassapput.
USA-p nunatsinni mittarfinnut ’dual use’-mik siunertalinnut - tassalu mittarfinnut inuinnarnit sakkutooqarnikkullu atorneqarsinnaasunut - aningaasaliinissaminut piareersimalluni septembarimi nalunaarutigaa.
AAMMA ATUARUK Itigartitsisinnaatitaaneq aktianik piginneqatigiiffinni nalinginnaasuuvoq
Ministeriunerup Lars Løkke Rasmussenip (V) Folketingimi sapaatit akunneranni uani apeqqarissaartoqarnerani oqaatigaa USA-p taama nalunaaruteqarnera, nammineq naliliinini naapertorlugu, amerikamiut nunatsinni mittarfinnut dollarserpassuarnik qanittukkut aningaasaliinissaattut paasineqartariaqanngitsoq.
- Mittarfinnut matumani eqqartukkatsinnut amerlasoorsuarnik malunnaatilimmillu aningaasaliinissamut piareeersimanertut nalilinngilara. Ingerlaavartumilli nalilersorneqartariaqarnera qularutissaanngilaq, ministeriuneq oqarpoq.
AAMMA ATUARUK Danmarkimut Kalaallit Airportsimi pissaaneqalersitsisoq
