Ilisimasallit: Itigartitsisinnaatitaaneq aktianik piginneqatigiiffinni nalinginnaasuuvoq

Aktianik piginneqatigiiffinni ikinnerussuteqarlutik piginneqataassutillit amerlanertigut itigartitsisinnaatitaasarput, piginneqatigiiffiit pillugit inatsisiliornermik immikkut ilisimasalik oqarpoq. Danmarkilli Kalaallit Airports A/S-imi piginneqataassutaata siunissami pisiarinissaat ajornakusuussasoq, taanna nalililiivoq.

Danskit naalagaaffiata Kalaallit Airports A/S-imi, mittarfinnik nutaanik sanaartortitsissussami, annertuumik oqaasissaqartitaanissaa illuatungiliuttunit ernumanartoqartinneqarlunilu isornartorsiorneqarpoq.

Ingerlatseqatigiiffilli Nuummi Ilulissanilu mittarfinnik ingerlatsisussaq pillugu pingaarutilinnik aalajangiisoqassatillugu Danmarkip nunattalu isumaqatigiittarnissaat pissusissamisoorluinnartuussaaq.

Piginneqatigiiffiit pillugit inatsisiliornermik immikkut ilisimasallit arlallit KNR-imut taama oqarput, ilaatigut piginneqatigiiffiit pillugit inatsisiliorneq pillugu lektori, Copenhagen Business Schoolillu immikkoortortaqarfiani "Law"-imi pisortap tullia, Troels Michael Lilja.

AAMMA ATUARUK Danmarkimut Kalaallit Airportsimi pissaaneqalersitsisoq

- Piginneqatigiiffiit matumanitut taama annertutigisumik aningaasaliiffiusussat eqqartortillugit, tamatumunngalu peqatigitillugu piginneqataasut taama ikitsigitillugit (Kalaallit Nunaat Danmarkilu, aaqq.), taava pingaarutilinnik aalajangiisoqassatillugu itigartitsisinnaatitaanissamut periarfissaqarnissaq nalinginnaasuusarpoq. Taamaattoqanngippammi, illuatungerisap illuatungerisami akueriinnagassaanik qanorluunniit iliorsinnaassammat.

Danmarkip piginneqatiginissaanik isumaqatigiissut atsioqatigiissutigineqarpat, Namminersorlutik Oqartussat Nuummi Ilulissanilu mittarfinnik 2/3-mik piginneqataassapput, danskillu naalagaaffiat piginneqatigiiffiup 1/3-ia pigissallugu.

Naligiimmik taasisinnaatitaasoqanngippat Namminersorlutik Oqartussat piginneqatigiiffiup siunertaanik allanngortitsisinnaavoq, soorlu assersuutiginnarlugu mittarfiit qimussertarfissanngortissinnaavai, danskillu naalagaaffiat tamatumunnga oqaasissaqartitaanani.

AAMMA ATUARUK Piginneqataassutit pillugit isumaqatigiissut Inatsisartuni oqallisigineqarnissaa pissutissaqanngilaq

Lektori: Kalaallit Nunaat Danmarkilu isumaqatigiissutikkut imminnut pituttorluinnassapput

Kalaallit Nunaata Nuummi Ilulissanilu mittarfiit kisermaallugit siunissami ingerlakkusulissagaluarpagit, taava Namminersorlutik Oqartussat danskit naalagaaffiata piginneqataassutai pisiarissagunigit Danmark akuersiteqqaartariaqassavaa, Troels Michael Lilja nassuiaavoq.

- Matumani isumaqatigiissut katititaanermut assersuunneqarsinnaavoq, isumaqatigiissummi atuutsillugu arlaatigut imminnut atalluinnartuussapput.

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat