Kielsen: Piginneqataassutit pillugit isumaqatigiissut Inatsisartuni oqallisigineqarnissaa pissutissaqanngilaq

Inatsisartuni politikerit Danmarkip Kalaallit Airports A/S-imut piginneqataassuteqarnermut isumaqatigiissutaata imarisaa, Naalakkersuisut Danmarkimi aningaasaqarnermut ministereqarfillu maannakkut isumaqatigiinniassutigileruttugaat ilisimasariaqaraluaraat, Inuit Ataqatigiit isumaqarput. Kim Kielsenili isumaqarpoq Inatsisartut akuliutinngikkaluarlutik naalakkersuisut isumaqatigiinniarsinnaatitaasut.

Inatsisartuni politikerit Danmarkip Kalaallit Airports A/S-imut piginneqataassuteqarnermut isumaqatigiissutaata imarisaa, Naalakkersuisut Danmarkimi aningaasaqarnermut ministereqarfillu maannakkut isumaqatigiinniassutigileruttugaat ilisimasariaqaraluarpaat, tamannalu Inatsisartut mittarfiit Nuummi, Ilulissani allilerneqarnissaanut Qaqortumilu mittarfiliornissamut tunngatillugu sisamanngorpat tulliani pingajussaanik naggasiutigalugulu taasissutigineqannginneranni pisariaqarpoq, Inuit Ataqatigiit taama isumaqarput..

AAMMA ATUARUK Inatsisartut piginnittutut Danmarkimik isumaqatigiissut takoqqaarnagu akuereratarsinnaagaat

Partiip danskit naalagaaffiata Kalaallit Airports A/S-ip siulersuisuini itigartitsisinnaatitaalersinnaanerat qasseeriarlutik ernumassutiginerarpaa aamma naak naalagaaffik minnerusumik piginneqataassuteqaraluarluni.

- Taamaammat piginneqataassuteqariaaseq siunissamo iluanaaruteqarnissaq aamma nunatta aalajangeeqataasinnaassusianut apeqqutinut allannguerujussuarsinnaavoq. Taamaammat inatsisartut suna isumaqatigiissut nunatta avataanut naalakkersuisut suliariniarneraat nalunngeqqaartariaqarpaat, siulittaasup tullia, Aqqaluaq B. Egede (IA) KNR-imut oqarpoq.

Kalaallit Airports A/S-imut danskit - immaqalu amerikamiut aningaasaleeqataasinnaanerat IA-p taperserpaa, nunattali danskit amerikamiullu naalagaaffiisa piginneqataalernerisigut atugassarititaasussat piareersimaffigissagai isumaqarpoq.

Kielsen: Naalakkersuisut pisussaaffigaat

Mittarfiit allilernissaannut inatsisip allanngortinnissaanut siunnersuut naapertorlugu isumaqatigiissut Inatsisartuniluunniit suliarineqartinnagu Naalakkersuisut Danmarkip Kalaallit Airportsimut piginneqataassuteqalernissaanut isumaqatigiissusiornissamut iliuuseqarsinnaassapput.

Naalakkersuisut siulittaasuat, Kim Kielsen (S) naapertorlugu piginneqataassutimik isumaqatigiissuteqarniarnissamut Naalakkersuisut Inatsisartuni piginnaatitaassuteqareerput. Taannalu Naalakkersuisut akisussaassuseqartumik ingerlatariniaraat, Kim Kielsen KNR-imut mailikkut aallappoq, ilanngullugu:

AAMMA ATUARUK Sakkutuulersornerulersinnaaneq qallunaallu akuliunnissaat IA-p aarleqqutigigaa

- Taamaattumik apeqqut taanna Inatsisartunit isummerfigineqareersoq Naalakkersuisut siulittaasuat isumaqarpoq. Apeqqutillu pineqartup Inatsisartuni immikkut ittumik eqqartorneqarnissaanut tunngavissaqarsorinanngilaq, Kim Kielsen allappoq.

Aammattaaq suliap Aningaasaqarnermut Akileraartarnermullu ataatsimiititaliami suliarineqarnissaa siunertaralugu siunersiuisitsiniarluni oqaatigalugu. Matumani danskit naalagaaffiata piginneqataassut pillugu suliaqarnerup killilerneqarnissaa naatsorsuutigaa.

Aamma Aningaasaqarnermut Akileraartarnermullu ataatsimiititaliap siulittaasuata, Karl Kristian Krusep (S) Inatsisartuni Aningaasaqarnermut Akileraartarnermullu Ataatsimiititaliap isumaqatigiissut Danmarkimut isumaqatigiissutigineqareerpat takussallugu naatsorsuutigaa.

Inatsisartut mittarfinnut pilersaarut novembarip 15-ianni naggammik taasissutigissavaat.

AAMMA ATUARUK Danmark sunniisinnaassuseqarpallaalissaaq

AAMMA ATUARUK Mittarfiit pillugit siunnersuut ataatsimiititalimut ingerlateqqinneqartoq