Mittarfiit: Inatsisartut piginnittutut Danmarkimik isumaqatigiissut takoqqaarnagu akuereratarsinnaagaat
Inatsisartunut ilaasortat mittarfiliortiternissamik pilersaarut inaarutaasumik sapaatit akunneranni tullermi suliarigunikku, danskit naalagaafiata Kalaallit Airports A/S-imi piginneqataanissamini qanoq atugaqarnissaa, isumaqatigiissut suliluunniit atsiorneqanngitsoq, akuersissutigeratarsinnaavaat.
Inatsisissatut siunnersuummut allannguutissatut siunnersuummi paragraffit arfernanni immikkoortut pingajuanni ima allassimavoq:
”Naalakkersuisut Kalaallit Airports A/S-mi Nuummi aamma Ilulissani nunanit tamalaanit mittarfiit sanaartorneqarnissaannut ingerlanneqarnissaannullu ingerlatseqatigiiffimmi immikkoortortaqarfiusumi aktiaatilittut pisinnaatitaaffiit pillugit danskit naalakkersuisuinut piginnittut isumaqatigiissutaannik isumaqatigiissuteqarnissamut piginnaatinneqarput.”
Naalakkersuisut taamaalillutik pituttorneqaratik naalagaaffiup aktiaatissai taamaalillunilu aamma Nuummi Ilulissanilu mittarfissuassani piginneqataanissaanut Danmarkimik isumaqatigiissusiorsinnaapput.
AAMMA ATUARUK Palle Jerimiassen mittarfiit pillugit nuannaartoq
Naalakkersuisut Siulittaasuata Naalakkersuisoqarfia KNR-imut ilisimatitsivoq, piginneqataasutillit isumaqatigiissutissaannik Danmarkimi aningaasaqarnermut ministereqarfiup Namminersorlutillu Oqartussat isumaqatigiinniarnerat novembarip 15-iutinnagu naammassissanersut nalunartoq. Inatsisartut mittarfiliortiternissamik siunnersuut ulloq taanna inaarutaasumik taasissutigissavaat.
Naalakkersuisut siulittaasuata, Kim Kielsen (S), isumaqatigiissut Inatsisartut Aningasaqarnermut Akileraartarnermullu Ataatsimiititaliaanut saqqummiukkumanerlugu nammineq aalajangertussaavaa, novembarip 15-ia tikitsinnagu kingornaluunniit atsiorneqarnersoq apeqqutaatinnagu.
Løkkep Kielsenillu isumaqatigiissutaat aamma akuersissutigineqarsinaavoq
Aamma Nuummi Ilulissanilu mittarfissuassanut Lars Løkke Rasmussenip Kim Kielsenillu isumaqatigiissutaat Inatsisartut immikkoortillugu oqaluuserissanngilaat.
MIttarfiliortitsinissamik siunnersuummut ataatsimoortumut ilaaginnarpoq, taamaalillunilu novembarip 15-ani akuersissutigineqassalluni.
AAMMA ATUARUK Mittarfiit pillugit siunnersuut ataatsimiititalimut ingerlateqqinneqartoq
Demokraatit Naalakkersuisullu Mittarfiliortiternissamut atatillugu Danmarkimik isumaqatigiissutip Inatsisartunit akuersissutigineqarnissaa sulissutiginiarlugu isumaqatigiissutigaat. Tassalu tamanna pisinnaavoq Demokratit illua tungiliuttullu piginneqataassuteqartut isumaqatigiissutaata ima takusimanngikkaluaraat.
Isumaqatigiissummi ilaatigut Kalaallit Airportsimi agguagarsisarnissamut naatsorsuutigisat, pisortaqarfiup inuttalersugaanera minnerunngitsumillu itigartitsisinnaatitaaneq pillugit atugassaasussat ilaassapput.
Illua tungiliuttut partiiata Inuit Ataqatigiit danskit naalagaaffiata KAlaallit Airports A/S-ip siulersuisuini itigartitsisinnaatitaanissaa kissatiginagu oqaatigereerpaa. Aamma Partii Naleqqap isumaqatigiissut isornartoqartippaa.
AAMMA ATUARUK Sakkutuulersornerulersinnaaneq qallunaallu akuliunnissaat IA-p aarleqqutigigaa
Inatsisartunili amerlanerussuteqartut, tassa Naalakkersuisut aamma Demokraatit, allannguutissatut siunnersuut akueralugu ataasiarlutik taasereerput. Tassa novembarip aallaqqaataani aappassaaneerneqarmat, taamani pingajussaaneerneqannginnerani aningaasaqarnermut akileraartarnermullu ataatsimiititaliamut suliassanngortinneqarmat.
AAMMA ATUARUK Danmark sunniisinnaassuseqarpallaalissaaq
