Palle Jerimiassen mittarfiit pillugit nuannaartoq

Mittarfiliortiternissami pilersaarut Inatsisartut aalajangiiffiusumik pingajussaaniigassanngorlugu ippassaq suliaraat.

Naalakkersuisoqatigiit Siumut, Atassut aamma Nunatta Qitornai mittarfiliortiternissamut tapersersorpaat, Demokraatinillu ilalerneqarlutik. Illua tungiliuttut partiivi, Partii Naleraq aamma Inuit Ataqatigiit suli akerliupput.

Mittarfiliortiternissamilli pilersaarutip tamaanga killinnera pillugu nuannaartut ilaat tassaavoq  Avannaata Kommuniata borgmesteria Siumumeersoq Palle Jerimiassen.

AAMMA ATUARUK Mittarfiit pillugit siunnersuut ataatsimiititalimut ingerlateqqinneqartoq

- Ippassaq taamatut aalajangertoqarmat iluarpoq aamma nuannaarutigivara kiisami. Sivisuumik suliaq ingerlanikuuvoq, ilaatigut ilumut piviusunngussanersoq nalornilertaraluarluta, massakkut ippassaq aalajangernerup upperinnilersippaatigut mittarfittaarnissaq massakkut tassa piviusunngulersoq, tamannalu nuannaarutigisorujussuuarput.

Ingammillu mittarfissap 2200 meterinik takissuseqarnissaa, borgmesterip iluarisimaarpaa.

AAMMA ATUARUK Danmark sunniisinnaassuseqarpallaalissaaq

- Borgmesterinngoramali pingaartillugu suliarinikuuara, 2200 meterimik takissusilimmik mittarfittaarnissaq anguniarnikuuara, taamaattumik ippassaq taamatut aalajangertoqarmat massakkut borgmesteritut assut nuannaarutigaara neriulluarfigalugulu.

Mittarfiliortiternisssamik pilersaarutikkut ilaatigut nunarput amerlanerusunik takornariaqalernissaa anguniagaavoq, kisianni tamatuma angunissaanut kommunit piareersaasiortariaqarput. Palle Jerimiassenili oqarpoq Avannatta Kommunia piareersaasiorluni aallartereertoq:

AAMMA ATUARUK Naalakkersuisoqatigiit Demokraatillu Mittarfiliortiternissamik suliaq ingerlateqqeqquaat

- Ukiorpassuarni piareersarneq ingerlatereernikuuarput, taamaattumik upperivarput takornariaqarnikkut annerpaaneq annertuumik suli ingerlariaqqitsissinnaassallugu. Kommunit tungaaninngaanniit pilersaaruteqarpugut aamma inuussutissarsiortut assigiinngitsut annertuunik aamma pilersaaruteqarput, suliap kinguarteqattaarneranik utaqqimaartoqarnikuuvoq, massakkullu aalajangertoqarnerata kingunerisaanik ukua periarfissat nutaat takkuttussat massakkut tassa piviusunngortinniartussanngorpagut.

Nuummi mittarfiup tallineqarnissaa siunniunneqarmat, Sermersuup borgmesteria Asii Chemnitz Narup oqaaseqartinniaraluarparput. Siunnersuulli Inatsisartuni novembarip 15-iani pingajussaaneerneqartinnagu oqaaseqarusugani nalunaarutigaa.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat