Mittarfiit: Kalaallit Airportsip suliariumannittussarsiuussineq januaarimi aallartissangatikkaa

Nuummi Ilulissanilu mittarfiit nutaat sanaartornissaannut suliariumannittussarsiuussinerup januaarip naalernerani aallartinnissaa naatsorsuutigineqarpoq.

Kalaallit Airports taama nalunaaruteqarpoq, mittarfiliortiternissallu akuersissutigineqarnerata kingorna mittarfiliassanut piffissamut pilersaarutissatut naatsorsuutigineqartoq saqqummiullugu.

AAMMA ATUARUK Mittarfinnut pilersaarut akuerineqarpoq

- Nuannaarutigaarput maannakkut mittarfinnut suliniutit ingerlateqqinnissaat pillugu politikkikkut erseqqissaasoqarsimammat, ingerlatseqatigiiffiup ukiuni kingullerni siusinnerusukkut politikkikkut aalajangiinerit tunngavigalugit piareersarsimasaanik, Kalaallit Airportsimi pisortaaneq Steffen Ulrich-Lynge taama oqarpoq.

Sanaartortugassamillu isumaginnittussap 2019-imi maajip qaammataani toqqarneqarnissaa ingerlatseqatigiiffiup naatsorsuutigaa, tamatumalu kingorna sanaartorneq sapinngisamik piaarnerpaamik aallartinneqassaaq.

AAMMA ATUARUK Mittarfinnut pilersaarut pillugu ilisimasaqarnerulerit

Sanaartugassanik isumaginnittartoq alla neqerooruteqartussat ilaattut Kalaallit Airportsimit oktobarip qaammataani akuerineqarpoq. Tassalu Canadameersoq Bird Johnson Joint Venture, Canadami sanaartornernik annertuunik immikkut suliaqartartoq.

Qaqortumi mittarfiliornissaq pillugu suliaq aamma ingerlavoq. Pilersaarusiorneqarnissaanut suliariumannittussaarsiuunnissaanullu Kalaallit Airports piareersaatinik suliaqareerpoq, Kujataanilu mittarfittaassaq Nuummi Ilulissanilu mittarfissuit naammassinissaat peqatigalugu naammassineqarnissaa aamma suli pilersaarutaalluni.

AAMMA ATUARUK Per Aarsleff A/S suliariumannittussarsiuussinermit tunuartoq