Siulittaasunngortoq: KANUKOKA ingerlaannassaaq

KANUKOKA-p siulittaasortaava Simon Simonsen, kommunit kattuffianni siulersuisut Maniitsumi sapaatit-akunnerata naanerani ataatsimiinnerisa kingorna taama oqarpoq.

Siulersuisut suleqatigiissitaliorniarlutik aalajangersimapput, taakkulu KANUKOKA-p qanoq iluseqarluni ingerlateqqinnissaanut oktobarip aallartinnera nallertinnagu siunnersuuteqassallutik.

Kommunit kattuffimmut ilaasortaasut pingasuusut tamarmik immikkut marlunnik suleqatigiissitani ilaasortaatitaqarput, saniatigullu aamma Simon Simonsen allaffeqarfimmeersorlu ataaseq ilaasortaallutik.

Kommunini pingasuusuni aningaasaqarnermut ataatsimiititaliat oktobarimi ataatsimiittoqalerpat aggersarneqassapput, taakkulu kattuffiup ilusissaa nutaaq inaarutaasumik akuerisussaassavaat.

Aamma atuaruk KANUKOKA-p qullersaqarfia tunineqartoq

Qaasuitsup Kommunia taamaalilluni kattuffimmut uteqqinniarluni aalajangersimavoq, naak KANUKOKA-p atorunnaarsinnissaanik ukioq manna siusinnerusukkut siunnersuutigisimagaluarlugu.

- Qaasuitsup Kommunia KANUKOKA-p nutaamik ilusilerneqarnissaanut peqataarusuppoq, aamma KANUKOKA-p ilusissaata nutaap oktobarimi saqqummiunneqarnissaanut Kommuneqarfik Sermersooq qaaqquniarlugu eqqarsaatigaarput, Simon Simonsen KNR-imut taama oqarpoq.

KANUKOKA-p Maniitsumut nuunneqarnissaa taamaalilluni suli aalajangiusimaneqarpoq.

Qeqqata Kommuniata borgmesteria Hermann Berthelsen siulersuisut sapaatit-akunnerata naanerani ataatsimiinneranni borgmesterini kisiartaalluni najuuppoq, Jørgen Wæver Johansen Ole Dorphilu oqarasuaatikkut peqataallutik.

Aamma atuaruk Suleqatigiinneq aqqutissaavoq