Suleqatigiinneq aqqutissaavoq

Nunatsinni kommunit suleqatigiinnissaat isumassarsiatsialaasoq Inatsisartuni partiit isumaqatigiissutigaat. Suleqatigiinnerli KANUKOKA-mi aaqqissuussinermilluunniit nutaamik pilersitsisoqarsinnaasoq, kommunit namminneerlutik aalajangissavaat.
juulip 01-at 2016 12:27

 

Qaasuitsup Kommuniani kommunalbastyrelsi isumaqatigiittoq, aaqqissuussinermik nutaamik pilersitsisoqassasoq siunnersuutigaat.

Demokraatit Siumullu kisiartaallutik KANUKOKA atorunnaarsinneqassasoq isumaqatigaat.

- KANUKOKA-p atorunnaarsinneqarnissaanut 2010-mili siunnersuutitsinnut tulluarpoq. Taamaammat siunnersuut ilassilluarpara, Demokraatit politikkikkut oqaaseqartartuat Justus Hansen oqarpoq.

KANUKOKA-p atorunnaarsinneqarnissaanut isumaqataagaluarluni kommunit suleqatigiittariaqartut taanna isumaqarpoq.

Tamanna Jens Immanuelsenimit isumaqataaffigineqarpoq

- Taamaattumik tapersersuinnagassaavoq kattuffimmi ilaasortaasut, apeqqutaaginnarpoq qanoq namminneq ilusiliiumaarnersut. Kommunimit aallartitat tassaapput ulluinnarni kommunalbestyrelsemi piginnaatinneqartut allannguinermik suliaqartussat, Jens Immanuelsen KNR-imut oqarpoq.

Kommunilli suleqatigiinnissaat Atassummit orniginartinneqarnerugaluarpoq kisiannili:

- Nuna tamakkerlugu politikkimik suliaqartut kommunit qanoq suleqatigiinnissaminnik isumaqatigiinnerat akuliuffigisussaanngimmassuk, Atassut sinnerlugu politikkikkut oqaaseqartartoq, Steen Lynge taama oqarpoq.

Isertuutinngilaali suleqatigiinnissaq aqqutissaammat.

Politikkikkut illuatungiliuttut Inuit Ataqatigiit isumaqarput, kommuunit namminneerlutik tamanna aalajangissagaat

- Soqutiginartutut tiguarput. Soorunami kommunit namminneq qanoq kattunniarnerlutik qanorlu kattuffeqarnikkut ingerlatsiniarnerlutik namminneq aalajangiutissavaat, kisianni soqutiginartipparput aammaisumaqarpugut kommunit ajunnginnerpaamik inissisimassasut sisamaallutik tamakkerlutik suleqatigiissinnaagunik, Inuit Ataqatigiit siulittaasuat Sara Olsvig KNR-imut oqarpoq