KANUKOKA-p qullersaqarfia tunineqartoq
KANUKOKA-mi siulersuisut KANUKUKA-p Nuummi illuutaasa tuniniarneqarnissaat pillugit pingasunngornermat oqarasuaatikkut ataatsimiipput
KANUKOKA-p qullersaqarfigisimasaa Katuap akiani P.H. Lundsteensvejimiittoq tunineqareertoq, illunik tuniniaasartut Lynges Bolig og Erhverv paasissutissiipput.
Illu 18 millionit koruuninik naleqartutut nalilerneqarsimasoq, kimut imaluunnit kikkunnut tunineqarsimanersoq, qanorlu akilerneqarsimanersoq, illunik tuniniaasartut oqaatigerusunngilaat.
Aamma atuaruk Suleqatigiinneq aqqutissaavoq
Illut allat tuniniarneqartut
Illup Nuup qeqqani inissisimasup saniatigut KANUKOKA-mi sulisut atorfimminnut atatillugu najugarisaat illut qulingiluat tuniniarneqarput.
Taakkua tamarmik tunineqarunik isertitsissutaangaatsiarsinnaasut, Simon Simonsen KANUKOKA-mi aggustip aallaqaataanit siulittaasuugallartussaq oqarpoq.
- Illuutigut nalilerneqarnikuupput. Allaffik 18 millionit koruuninik nalilerneqarnikuuvoq, taavalu illuutit ilanngukkaanni katillugit 35-40 millionit koruunit tungannut isertitsissutaasinnaanissaat nalilerneqarnikuuvoq. Kisianni nioqquteqarneq ingerlagami qanoq inerneqassanersoq suli nalunarpoq, Simon Simonsen taama oqarpoq.
KANUKOKA-p kommuninut qinersinissap tungaanut anguniagassai pillugit kattuffiup siulersuisui aggustip ingerlanerani ataatsimiissapput.
- Tassanilu KANUKOKA-p ukiamit aappaagu aprilimi qinersiffissap tungaanut qanoq ingerlariaqqinnissaa tassani oqallisigineqartussaassaaq. Qanoq isikkoqarluni qanorlu suleriaaseqarluni ingerlassanersoq tassani eqqartorneqartussaavoq, Simon Simonsen taama oqarpoq.