Politikki

Siulersuisunut siulittaasoq: Sinneqartooruteqarfiunnginneq asuleernerussaaq

Air Greenlandimik piginnittut timmisartuutileqatigiiffiup aningaasaataanik 274 million koruuninik ataasinngormat agguagarsipput. Aningaasat piginneqataasunut tunniunnagit, billetsinik akikilliliisoqarnissaa innuttaasut nittartakkatigut attaveqaqatigiittarfinni ujartorpaat. Tamannali sullivimmik ingerlatsinikkut isigalugu asuleernerussasoq, siulersuisunut siulittaasoq isumaqarpoq.

Allattoq Bibi Nathansen

apriilip 29-at 2016 14:45

- Sinneqartooruteqarfiunngitsumik sulissasugut toqqaannanngitsumik oqarputit, tamannali asuleernerussaaq, Air Greenlandimi siulersuisunut siulittaasoq, Søren Lennert Morten KNR-imut oqarpoq.

Air Greenlandip piginnittuminut, tassa Namminersorlutik Oqartussanut, SAS-imut danskillu naalagaaffiannut, sinneqartoorutinik tunniussinani, billetsinik akikilliliisimagaluaruni isumassarsiatsialaanngitsoq siulittaasoq isumaqarpoq.

- Piginneqataassutinik peqaraannit iluanaarutinik pissarsinissamut pisinnaatitaaffeqarpoq. Sinneqartoorututit ukiorpaalunni katersaasimapput, massakkullu ataatsikkut tunniunneqaramik amerlapput, Søren Lennert Mortensen nassuiaavoq.

Aamma atuaruk Søren Lennert Mortensen Air Greenlandimi siulittaasunngorpoq

Aningaaserivimmi Sydbankimi piginneqataassuteqarneq pillugu nalilersuisartut pisortaat Jakob Pedersen, timmisartuutileqatigiiffiit aningaasaataanik ilisimasaqartuuvoq, KNR-imiillu aperineqareerluni Air Greenlandip ukiumoortumik nalunaarusiaat misissorsimavaa, siulittaasorlu isumaqatigivaa.

- Piginneqatigiiffiup aningaasaatai ikilisarniarlugit akit appartinneqassappat, taamaalillunilu ukiualunni amigartooruteqarluni ingerlalluni? Taamaaliornissaq inuussutissarsiortuugaanni isumaqanngilaq, Jacob Pedersen KNR-imut oqarpoq.

Air Greenlandip akitigitani isertitaminik ikilisaagaluaruni navianartorsiulissaaq taanna naliliivoq. Taamaassaaqingammik ukiut arlaqanngitsut qaangiuppata mittarfiit tallineqassappata nutaanilluunniit mittarfiliortoqarpat unammillerneqarnerulerluni.

Aamma atuaruk Siulersuisut toqqarneqarnerannut tunngavilersuutit Transparencymit paaserusunneqarput

- Akitsueqqittariaqalerfimmi, ingammillu unammillertinit tatineqarfimmi taammaaliorsimaneq unammillernartupilussuarmut inissinnermik kinguneqartitsisinnaavoq, Jacob Pedersen oqarpoq.

Timmisartuutileqatigiiffik naleqqutinngitsumik akisutitsinersoq Air Greenlandip naatsorsuutaani takussutissaqanngitsoq Jacob Pedersen naliliivoq.

- Amerlavallaanik aningaasarsiornersut eqqarsanngilanga. Timmisartuutileqatigiiffiunera eqqarsaatigigaanni angusarissaarput - ingasattajaanngillat - nunanili allani takusartakkatsinnut naleqqiullugit ajunngillat, Jacob Pedersen oqarpoq.

Air Greenlandip unammillerfiuvallaanngitsumi timmisartuussisartuunera, tassalu immikkuullarissumi sullissisuusut, erseqqissarpaa

- Aammalumi immikkuullarissumim suliaqartunik allanik Air Greenlanditulli iluanaaruteqartoqartarpoq. Periarfissanik iluatsitsiniarneruvoq, tassami periarfissanik iluatsitsiniartoqartarpoq ajunngitsunillu angusaqarluni, soorlu Air Greenland massakkut taamaaliorpoq, Jacob Pedersen oqarpoq.

Namminersorlutik Oqartussat Air Greenlandimik piginneqataanermigut 102,75 millionit koruuninik pissarsipput. SAS danskillu naalagaaffiat 171 millionit koruunit missaannik pissarsipput.