Søren Lennert Mortensen Air Greenlandimi siulittaasunngorpoq
Air Greenlandimi siulersuisuini ilaasortat marluk Namminersorlutik oqartussanit toqqarneqartut taarserneqarput.
Siulittaasup Jens Wittrup Willumsenip Air Greenlandimi ukioq qaangittoq pillugu nalunaarut saqqummiukkamiuk timmisartuutileqatigiiffimmi siulittaasutut saqqummiussinera kingulliuvoq.
Naalakkersuisut aalajangerput Air Greenlandip siulersuisuini ilaasortat Namminersorlutik Oqartussat toqqagaat marluk taarserneqassasut. Air Greenlandip siulersuisui qulingiluanik ilaasortaqarpoq.
Aamma atuaruk Air Greenland nutaamik siulittaasortaarpoq
Siulersuisuni tunuartut tassaapput Julia Pars aamma Jens Wittrup Willumsen ilaasortanngortullu nutaat tassaapput, Søren Lennert Mortensen aamma Bodil Marie Damgaard.
Bodil Marie Damgaard Nukissiorfinni sulisunut pisortaasimavoq aamma Air Greenlandimi sulisunut immikoortortaqarfiani sulisimalluni.
Søren Lennert Mortensen siusinnerusukkut KNR-imi pisortaavoq maannakkullu inissianik tuniniaavimmi LM ejendommeni piginnittuulluni.
Søren Lennert Mortensen timmisartuutileqatigiiffiup siulersuisuini siulittaasunngorpoq.
Naalakkersuisut siulittaasuata Kim Kielsenip siulersuisut taarserneqarneannut ima tunngavilersutigaa
- Siulersuisuni ilasortap aappa ukiuni qulingiliuni siulersuini ilaasortaavoq aappaalu ukiuni tallimani taava maannakkut isumaqarpugut taarsisallugit, Kim Kielsen oqarpoq.
Naalakkersuisut siulittaasuata Kim Kielsenip Namminersorlutik Oqartussanit toqqarneqartut tassalu Søren Lennert Morten aamma Bodil Marie Damgaard toqqarneqartut pillugit ima oqarpoq:
- Piginnaaneqartutut nalilerneqarsimapput Naalakkersuisuniit taamaattumik inuit taakkua aamma toqqarneqarput, Kim Kielsen oqarpoq.
Air Greenlandip ataatsimeersuarnerata kingorna nunatta karsia amerlasunik immerneqarnissaa naalakersuisut naatsorsuutigisinnaavaat.
Siulersuisuit innersuussutaat tassalu timmisartuutileqatigiiffimmik piginnittut 274 millionit koruuninik agguagarsinissaat ataatsimeersuarnermi akuersissutigineqarpoq. Taamaattumik Namminersorlutik Oqartussat 102 millionit koruuninik pissarsissapput, piginneqatigiissutit 37,5 procentiniit pisut.
Agguararsiat amerlannerannut pissutaavoq timmisartuutileqatigiiffik anigaasaateqarluarmat, siulersuisuni tunuartoq Jens Wittrup Willumsen 2015-imut nalunaarut saqqummiukkamiuk taama oqarpoq.
