Siulersuisut toqqarneqarnerannut tunngavilersuutit Transparencymit paaserusunneqarput
Air Greenlandip ataasinngornermat ataatsimeersuarnerani Namminersorlutik Oqartussat sinnerlugit siulersuisuni ilaasortat marluk Naalakkersuisunit taarserneqarput - siulittaasoq Jens Wittrup Willumsen aamma taaserneqarpoq.
Aamma atuaruk Søren Lennert Mortensen Air Greenlandimi siulittaasunngorpoq
- Siulersuisuni ilaasortanngortut marluk toqqarneqarnerat tunngavilersorluarneqarsimassaaq, kisiannili tunngavilersuutigineqartut paasinngilagut, Jakob Strøm Transparency International Greenlandimi siulittaasup tullia, Air Greenlandip siulersuisuini ilaasortassatut Namminersorlutik Oqartussanit toqqagaasut Søren Lennert Mortensen aamma Bodil Marie Damgaard pillugit, oqarpoq.
Jakob Strømip erseqqissarpaa siulersuisuini ilaasortanngortut marluk Transparancymit assuarineqanngimmata, ujartugaali tassaasoq pisortatigoortumik ersarissumik sooq taakkorpiaat toqqarneqarnerisa tunngavilersorneqarnissaat.
- Isumaqarpugut tamanna amigaataasoq, piginnaasat sorpiaat ujartorneqarsimanersut siulersuisuinilu ilaasortaanissamut piginnaasat pigineraat nalunaarutigineqarani.
Aamma atuaruk Air Greenland nutaamik siulittaasortaarpoq
- Naatsorsuutigilluinnaarpara siulersuisuni ilaasortanngortut pikkorissuusut, taakkuali siulersuisunut qinigaanerat pillugu ammanerusariaqaraluartut isumaqarpugut, Jakob Strøm Transparency International Greenlandimi siulittaasup tullia taama oqarpoq.
Siulersuisuinut ilaasortanik toqqaasoqarnermi isertuannginnissaq pingaaruteqartoq, Jakob Strøm oqarpoq, suliffeqarfiit inuiaqatigiinnit pigineqartut pineqarmata, suliffeqarfinnilu siulersuisunik toqqaasoqarnermi tunngavilersuutigineqartut pisortatigoortumik ilisimaneqartariaqarmata.
Tunngavilersuutigineqartut pisortatigoortumik saqqummiunneqarsimasuuppata kammaalersortoqarneranik isumaliutersortoqassanngikkaluartoq, Tranparency International Greenland isumaqarpoq.
Aamma atuaruk Kiffartuussinissamik isumaqatigiissuteqarfiusunut billetsit akiisa 2/3-lii pisortat akilertarpaat
Aammasumik periaaseqarneq kammalatersortoqarneraalluni assigisaannilluunnnik tusatsiagaqartalernissamut pinaveersaataavoq tupinnaannartoq. Siulersuisunut ilaasortassanik toqqaasarnermi piumasaqaatit qanoq ittuunerat toqqakkattalu piumasaqaatinik qanoq ilillutik naammassinninnerat pillugit ammasumik pissuseqarutta, taava tusatsiagassaqalernissaa pinngitsoortissavarput.
- Aalajangiinermi tunngavigineqartut piumasarineqartullu ammasumik saqqummiunneqartuuppata siulersuisunullu toqqagaasut naleqquttuunersut oqaluttuarineqartuuppata pasilliinerit pinngitsoortinneqarsinnaagaluarput, Jakob Strøm Tranparancy International Greenlandimi siulittaasup tullia taama oqarpoq.
Siulersuisuni ilaasortat toqqarneqarneranni taakkua suliffigisimasaannut ilinniagaannillu paasisutissat Naalakkersuisut pisortatigoortumik saqqummiuttariaqaraluaraat, Jakob Strøm isumaqarpoq.
