Kiffartuussinissamik isumaqatigiissuteqarfiusunut billetsit akiisa 2/3-lii pisortat akilertarpaat
Suka K. Frederiksenip, Siumumeersup, paragraf 37 naapertorlugu apeqquteqaataanut Ineqarnermut, Sanaartornermut Attaveqarnermullu Naalakkersuisup Knud Kristiansenip akissutaani tamanna erserpoq.
Suka K. Frederiksenip Naalaakkersuisut aperisimavai, Namminersorlutik Oqartussat illoqarfinnut nunaqarfinnullu tapiineq ajoraluarpata, tamanna angalasunut qanoq kinguneqassanersoq.
Akissuteqaammi erserpoq, kiffartuussinissamik isumaqatigiissut tunngavigalugu Air Greenlandip ilaasunut bilitsip akiviata 2/3-ia akilertarpaa.
- Tamakkiisumik isigissagaanni imaappoq, angalasup agguaqatigiisillugu bilitsip pingajorarterutaannaa akilertaraa, pisortallu sinnera 2/3-ia akilertaraat, Ineqarnermut, Sanaartornermut Attaveqarnermullu Naalakkersuisoq Knud Kristiansen akissummi taama allapoq.
Air Greenlandimi kiffartuussinissamik isumaqatigiissut tunngavigalugu 117 millionit koruunit ataatsimut 2015-imi akiliutigineqarsimapput.
