Assi: KNR/Anton Gundersen Lihn

SIP Uummannaq: Sulisut aningaasarsiassaralui matussusersigit

Uummannami erngup uuliamik mingutsinneqarnerata kingorna sulisorpassuit angerlartiinnarneqartariaqartut aningaasarsiorfeerupput. Nukissiorfiit akisussaaffimmik tigusisariaqartut sulisullu aningaasarsiassaralui matussusertariaqaraat SIK-p Uummannami immikkoortortaqarfiani siulittaasoq isumaqarpoq.

Royal Greenlandip Uummannami tunisassiorfia erngup mingunnerani matusariartut ilagaat. Sulisut 30-t missaanniittut angerlartinneqarput, taakkulu ilagaat Pele Hammond.

- Massakkut akissarsiaqarata angerlarsimaannarpugut, Pele Hammond oqarpoq.

Taanna septembarip 25-anili suliffimminit angerlartiinnarneqarpoq, taassuma suleqataasalu aningaasarsiarissaralui annaasaali taarsiiffigineqassanersut paasissutissiissutigineqanngilaq. Taamaammat Uummannami SIP-imi siulittaasup Jokum Zeebip Nukissiorfiit innuttaasunut septembarip 22-ani ataatsimiisitsimmata apeqqutigaa.

- Erseqqissumik akissuteqarsinnaanngillat taakku, Jokum Zeeb oqarpoq, taassumalu erseqqissaatigaa, ilaasortamik akiligassat suli akilersugassarigaat.

AAMMA ATUARUK Uummannami tunisassiorfimmi sulisut 30-t angerlartinneqartut

Pele Hammondip aningaasarsiatigut qanoq iliussanerluni angerlartsinneqarnermini aamma paasisimanngilaa.

- Taavalu eqqaaneqarani aningaasat tungaatigut qanoq iliussanersugut paasitinneqarnatalu, Pele Hammond oqarpoq. Suliffeqarfiullu suleqatigiit angerlartitaasut Majoriamut saaffiginneqqusimavai, tassani suliffissarsiortutut nalunaarsorneqassammata.

Royal Greenlandip pisuusutiginngilaa

Kukkuneq Royal Greenlandip tunisassiorfiata matugallartariaqarneranut pissutaasoq suliffeqarfiup pisuussutiginngikkaa, Royal Greenlandimi HR-imi pisortap Søren Olsen Damgaardip oqaatigaa.

Tunisassiorfiullumi matuneqarnissaa suliffeqarfimmut aamma pitsaasuunnginnerarpaa.

- Soorunami sakkortuumik eqqugaavoq. Kisianni tassa pisinnaasarput naapertorlugu ilungersorpugut taanna pisimasoq qaangerniarlugu, Søren Olsen Damgaard oqarpoq, oqaluttarlunilu Royal Greenland piffissami qaninnermi suliffeqartitseqqilerumaarnissani neriuutigigaa.

AAMMA ATUARUK Aalisartut uummannarmiut ikiorneqalersut: Assartuutissaq avannamukartinneqartoq

Royal Greenland sulisut angerlartittariaqarnerinut pisuunngitsoq Jokum Zeebip aamma erseqqissaatigaa. Nukissiorfiilli pisumut akisussaasuugamik, sulisut aningaasarsiassaralui matussusertariaqaraat, taanna isumaqarpoq.

- Matussusertariaqarpaat. Namminneq kukkunermikkut kinguneqartitsigamik taamatut suliffinnik matooraanernik, Jokum Zeeb oqarpoq. Nukissiorfiit pisumut oqaaseqartinniarsarigaluarparput, sulili iluatsinnagu.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat